ޕްރޮސިކިއުޓާ ޖެނެރަލްގެ އޮފީހުގެ ރައްޔިތުންގެ ޕޯޓަލްގެ ތެރެއިން ނޫސްވެރިންނަށް ވެސް މައުލޫމާތު ހޯދޭނެ ގޮތް ހަމަޖައްސައިފިއެވެ.

ޕީޖީ ޝަމީމް ވަނީ، އެމަނިކުފާނުގެ އަމިއްލަފުޅު ބްލޮގުގައި ޕީޖީން އަލަށްފަށާ މިމަސައްކަތުގެ މައުލޫމާތު ލިޔުުއްވާފައެވެ. އެމަނިކުފާނު ވިދާޅުވީ، ޢާންމުންނަށް ޖަވާބުދާރީވާ އިދާރާއެއް ރަނގަޅުގޮތުގައި ހިންގުމުގައި އެންމެ ބޮޑު އެހީތެރިކަމެއްދޭ ޕާޓްނަރަކީ ނޫސްވެރިންކަމަށެވެ. އަދި ދިވެހިރާއްޖޭގައި، ޒިންމާދާރު، ހަރުދަނާ، ހީވާގި އަދި ރޯޝަން ނޫސްވެރިކަމެއް އޮތުމަކީ އެމަނިކުފާނުގެވެސް މަޞްލަޙަތުގައި އޮތް ކަމެއް ކަމުގައި ޕީޖީ ހުސައިން ޝަމީމް އެމަނިކުފާނުގެ ބްލޮގްގައި ލިޔުއްވާފައިވެއެވެ.

ޕީޖީ ވިދާޅުވީ،  ޕްރޮސިކިއުޓަރ ޖެނެރަލްގެ އޮފީހުގެ ރައްޔިތުންގެ ޕޯޓަލަކީ، ޢާންމުންނާ މުޢާމަލާތުކުރުމަށް ތައްޔާރުކޮށްފައިވާ ޕޯޓަލެއް ކަމަށާއި، އެއީ، ސަރުކާރުގެ އީފާސް އޮތޮރައިޒޭޝަން ނިޒާމުގެ ތެރެއިން ކޮންމެ ދިވެހި ރައްޔިތަކަށްވެސް، ރައްކާތެރިކަމާއި އިތުބާރާއެކު ބޭނުންކުރެވޭނެ ޕޯޓަލެކެއް ކަމަށެވެ. އެޕޯޓަލުގައި މިހާރުވެސް ވަރަށް ގިނަ ޚިދުމަތްތައް ލިބެން ހުންނާނެ ކަމަށާއި މިޕޯޓަލުގެ ތެރެއަށް ނޫސްވެރިންގެ ސުވާލާއި ޖަވާބު ލިބޭނެ ބައެއް މިހާރު ވަނީ ހިމަނާފައި ކަމުގައި އެމަނިކުފާނު ވިދާޅުވިއެވެ.

ޕީޖީ ޝަމީމް ވިދާޅުވީ. ޕޯޓަލްގައި ނޫސްވެރިއެއްގެ ގޮތުގައި ރަޖިސްޓްރީވުމަށްޓަކައި އެނޫސްވެރިއަކު މަސައްކަތްކުރާ ނޫހެއްގެ ރަސްމީ އީމެއިލް އިން، [email protected] އަށް، ނޫސްވެރިޔާ ޕޯޓަލުގައި ރަޖިސްޓަރީވާން އެދޭ ނޫސްވެރިންގެ އައިޑީ ކާޑު ނަންބަރާއި ފުރިހަމަ ނަން ފޮނުވުމުން، އެ ނޫސްވެރިޔާއަކީ ޕީޖީ އޮފީހާ މުޢާމަލާތުކުރާ ނޫސްވެރިއެއްގެ ގޮތުގައި ރަޖިސްޓަރީކޮށްދެވޭނެ ކަމަށެވެ.

މީގެ އިތުރުން ޕީޖީ ވިދާޅުވީ، މިނިޒާމުގެ ތެރެއިން، މީގެ ކުރިން ކޮށްފައިވާ ސުވާލުތަކާއި، އެ ސުވާލުތަކަށް ދީފައިވާ ޖަވާބުތައްވެސް އަބަދުމެ ފެންނަން ހުންނާނެ ކަމަށާއި، ދެފުށްފެންނަ، ހަރުދަނާ، ދިވެހިރާއްޖެއަށް މުޅިން އައު، ނަމަވެސް، ދުނިޔޭގެ ފެންވަރުގެ ނިޒާމަކަށް ޕީޖީ އޮފީސް ކޮރަސްޕަންޑަންޓްސް ވެގެންދާނެ ކަމުގައެވެ.