ދިވެހި ޕްރިމިއަރ ލީގުގައި އަންގާރަ ދުވަހުގެރޭ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި ބުރު ސްޕޯޓްސް ބައްދަލުކުރި މެޗު 6-0 އިން ކާމިޔާބުކޮށް، ލީގުގެ އެއްވަނައިގައި އޮތް އީގަލްސްއާ އޮތް ފަރަގު އެއް ޕޮއިންޓަށް މާޒިޔާއިން ކުޑަކޮށްފިއެވެ.

މާޒިޔާގެ ފުރަތަމަ ގޯލު ކާމިޔާބުކުރީ ޕެނަލްޓަިއަކުން ހަމްޒާ މުޙައްމަދެވެ. ފުރަތަމަ ހާފުގައި އެ ޓީމަށް ދެން ގޯލުތައް ކާމިޔާބުކޮށްދިނީ ސާބިއާގެ ފޯވާޑް ވޮއިސްލާވް ބްލަބޮނޮވިޗް އާއި ޖަޕާނުގެ މިޑްފީލްޑަރު ޓޮމަކީ ވަޑާއެވެ. 

މެޗުގެ ދެ ވަނަ ހާފުގައި ދަނޑުގެ ލައިޓިންގ ސިސްޓަމްގައި މައްސަލަޖެހި ލައިޓުތައް ނިވުނެވެ. އަދި މިކަމުގެ ސަބަބުން ގިނަ ވަގުތުތަކަކަށް ކުޅުން މެދުކެނޑާލަން ޖެހުނެވެ. އެގޮތުން ދެވަނަ ހާފުގެ 4 މިނެޓު ކުޅުނު ފަހުން ބޮކިތައް ނިވިފައިވަނީ ގަޑިން 10:06 ގައެވެ. އަދި ލައިޓްތައް ރަގަޅުވެފައިވަނީ 10:38 ގައެވެ. 

މާޒިޔާއިން އެ ޓީމުގެ ބާކީ ގޯލުތައް ކާމިޔާބުކޮށްފައިވަނީ އޭގެ ފަހުންނެވެ. އަދި ފަހު ހާފުގެ ގޯލުތައް ފެނިފައިވަނީ ވަރަށް ކުޑަ ވަގުތުކޮޅެއްގެ ތެރޭގައެވެ. އެގޮތުން މާޒިޔާގެ ހަތަރުވަނަ ގޯލު ބްލަބޮނޮވިޗް ޖެހިތާ އެއް މިނެޓް ފަހުން ނާއިޒު ހަސަން މާޒިޔާގެ ފަސްވަނަ ލަނޑު ޖެހިއެވެ. އަދި އެ ޓީމުގެ ފަހު ގޯލު އޭގެ ދެ މިނެޓު ފަހުން ބްލަބޮނޮވިޗް ކާމިޔާބުކޮށް އޭނާގެ ހެޓްރިކް ފުރިހަމަ ކުރިއެވެ. 

އީގަލްސް އިން މިހާރު ތާވަލުގެ އެއްވަނައިގައި އޮތީ މާޒިޔާއަށް ވުރެން އެއް މެޗު އިތުރަށް ކުޅެ، އެއް ޕޮއިންޓުގެ ލީޑެއްގައެވެ. އެހެންކަމުން މާޒިޔާއިން ދެން އޮތް މެޗު ކާމިޔާބުކޮށްފިނަމަ ތާވަލުގެ އެއްވަނައަށް އަރާނެއެވެ. އޭރުން އީގަލްސް އިން ލީގު ކާމިޔާބު ކުރުމަށް ލީގު ފަހު މެޗުގައި މާޒިޔާ ބަލިކުރަން ޖެހޭނެއެވެ.