އާމްދަނީ ހޯދުމަށް ކައުންސިލްތަކަށް ލިބި ދިބިދިނުމަށް އެދޭ، އެއަތޮޅެއްގައި ހިމެނޭ ރަށްރަށާއި ފަޅުތައް ވަކިއުސޫލުތަކެއްގެ ދަށުން ކައުންސިލްތަކަށް ލިބޭނެތް ހަމަޖައްސަވައިފިކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އިއްޔެ ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ކައުންސިލްތަކުގެ އިޚުތިޞާޞްގެ ދަށުގައި، މިހާރު އެރަށަކުން ފެށިގެން 700 މީޓަރާ ދެމެދުގައި ހިމެނޭ ފަޅުތަކާއި ރަށްތައް ހިމެނޭގޮތަށް އޮތްނަމަވެސް ބައެއް ރަށްރަށުގެ އިޚުތިޞާޞް ހިނގާ ސަހަރައްދުގައި ރަށެއް ނެތުން ނުވަތަ ރަށެއް އޮތްނަމަވެސް އެހެން ކަމަކަށް އެރަށެއް ދޫކޮށްފައި އޮތުން ފަދަ ކަންކަން ކައުންސިލްތަކުން ފާހަގަކުރައްވާކަމަށެވެ. އަދި އެއީ ކައުންސިލްތަކުން ދެމެހެއްޓެނިވި ގޮތެއްގައި އާމްދަނީއެއް ލިބޭނޭ މަސައްކަތެއް ކުރުމަށް އޮތް ދަތިކަމެއް ކަމުގައިވެސް އެމަނިކުފާނު ވިދާޅުވިއެެެވެ.

ރައީސުލްޖުމްހޫރިއްޔާ ވިދާޅުވީ، ކައުންސިލްތަކުން އެދޭ ރަށްތަކާއި ފަޅުތައް ކައުންސިލްތަކަށް ލިބިދިނުމުގައި މައިގަނޑު ދެކަމަކަށް ބައްލަވާނެ ކަމަށެވެ. އެގޮތުން އެއް ކަމަކީ، ކައުންސިލްތަކުން އެރަށެއް ނުވަތަ ފަޅެއް ހޯދައިގެން ކުރަން ބޭނުންވާ ކަމަކީ، ޤައުމީ ތަރައްޤީގެ ޕްލޭނާއި އެއްގޮތަށް ހިންގޭ ކަމެއް ކަމުގައި ވުމާއި، އެރަށެއް ނުވަތަ ފަޅެއް އެ ކައުންސިލަކަށް ލިބި ދިނުމުގައި އަތޮޅުގައި ހިމެނޭ އެހެން ރަށްތަކުގެ ރުހުން އޮތުމެވެ.

އަދި ރާއްޖޭގެ ޤައުމީ ތަރައްޤީއަށް ބޭނުންހިފޭގޮތަށް، އަދި ރާއްޖޭގައި ހިނގާ މައިގަނޑު ސިނާއަތްތަކަށް ގެއްލުން ނުވާގޮތަށް އެފަދަ ފަޅެއް ނުވަތަ ރަށެއް ލިބުމުގެ ފުރުޞަތު ކައުންސިލްތަކަށް ދިނުމަކީ އޭގެ ސަބަބުން ރައްޔިތުން ބާރުވެރިކުރެވި ކައުންސިލްތައް އިތުރަށް ކުރިއަރައިގެންދާނެ ކަމެއްކަންވެސް ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.