އިންގްލިޝް ޕްރިމިއަރ ލީގުގައި ބުދަ ދުވަހުގެރޭ މެންޗެސްޓަރ ޔުނައިޓެޑުން ޗެލްސީއާ ދެކޮޅަށް އޯލްޑް-ޓްރެފަޑްގައި ނިކުންނަ މެޗުގެ ޕްރެސް ކޮންފަރެންސްގައި ހަތަރު މީޑިއާއަކަށް ބައިވެރިނުވެވޭނެކަމަށް ޔުނައިޓެޑުން ބުނެފިއެވެ. 

ރިޕޯޓުތައް ބުނާ ގޮތުން، މީޑިއާތަކަށް މިފަދަ ފިޔަވަޅެއް އަޅަން ޖެހުނީ، މިދިޔަ ހޮނިހިރު ދުވަހު ނިއުކާސްލްއާ ދެކޮޅަށް ކުޅުނު މެޗުގައި ޔުނައިޓެޑް ބަލިވުމުން، ކްލަބުގެ ކޮމެންޓެއް ނުހޯދާ ބޮޑެތި ފާޑު ކިއުންތައް އެ ޓީމަށާއި ކޯޗު އެރިކް ޓެން ހެގްއަށް އަމާޒު ކުރުމުންނެވެ. އެގޮތުން، ނިއުކާސްލްއާ ދެކޮޅަށް ކުޅުނު މެޗުގައި ޔުނައިޓެޑްގެ ޗޭންޖިންގ ރޫމްގައި ގިނަ ކުޅުންތެރިންތަކެއް ޓެން ހެގްގެ ބަހަށް ބޯ ނުލަނބާކަމާއި، ކުޅުންތެރިން އޭނާއަށް ކުރާ އިތުބާރު ގެއްލިފައިވާކަމަށް ބުނެ ނޫސްތަކުން ރިޕޯޓުކޮށްފައިވަނީ ކަމުގެ ހަގީގަތް ނުހޯދާކަމަށް ޔުނައިޓެޑުން ބުނެއެވެ.

އަދި ކޯޗު ޓެން ހެގްއަށް އަމާޒުކުރި ފާޑު ކިއުންތައް އޭނާވަނީ ދޮގުކޮށްފައެވެ. މިކަމާ ގުޅިގެން ޓެން ހެގް ބުނީ، އޭނާއަކީ އަބަދުވެސް ކުޅުންތެރިންގެ ވާހަކަތައް އަޑުއަހާ ކޯޗެއް ކަމަށެވެ. އަދި ނިއުކާސްލް މެޗަށްފަހު ޗޭންޖިންގ ރޫމްގައި އޭނާގެ ކޮންޓްރޯލް ގެއްލުނުކަމަށް ބުނެފައިވާ ވާހަކަތައް ވެސް ވަނީ ދޮގުކޮށްފައެވެ. އެގޮތުން އޭނާގެ އިރުޝާދުގެ ދަށުން ޔުނައިޓެޑުން ގެންގުޅޭ ކުޅުމުގެ ވައްޓަފާޅިއަށް ވެސް އެކެއް ނުވަތަ ދެ ކުޅުންތެރިއަކު ހިޔާލު ތަފާތުވި ނަމަވެސް، އޭނާ ގެންގުޅޭ ކުޅުމުގެ ވައްޓަފާޅިއަށް ޖުމްލަ ގޮތެއްގައި މުޅި ޓީމުން ވެސް ރުހޭ ކަމަށް ފާހަގަކޮށްފައިވެއެވެ. 

Advertisement

ޓެން ހެގްއާ ކުޅުންތެރިންނާ ދޭތެރޭ އޮތް ގުޅުމުގެ ވާހަކައަށް އަލިއަޅުވާލައި އޭނާ ބުނީ، އެ ޓީމުން އެވަޓަން އަދި ގަލަޓަސަރާއިއާ ދެކޮޅަށް ދެއްކި ކުޅުމާއި، ކާމިޔާބުކޮށްފައިވާ ގޯލުތަކަށް ބަލާލިޔަސް، ކުޅުންތެރިންގެ ގުޅުން ރަގަޅުކަން ސާފުވާނެ ކަމަށެވެ.