މެޑިކަލް ޗެކަޕާއި، ދަރިމައިވުމުގެ ފަރުވާ އާއި ބޯންމެރޯ ޓްރާންސްޕްލާންޓަށް އާސަންދަ ލިބޭ ގޮތް ހަމަޖައްސައިދިނުމަށް ނިންމާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އަންގާރަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި، ނިންމެވި ނިމުންތައް ހާމަކުރެއްވުމަށް ބޭއްވި ނޫސްވެރިންގެ ބައްދަލުމުގައެވެ.

ރައީސުލްޖުމްހޫރިއްޔާ ވިދާޅުވީ، ޑޮކްޓަރުންގެ ރިކުއެސްޓާއި އެކު އާސަންދައިން އަހަރަކު ދެފަހަރު މެޑިކަލް ޗެކަޕް ހެދޭ ގޮތަށާއި، އައިވީއެފް, އައިޔޫއައި އަދި ބޯންމެރޯން ހެދޭނެގޮތަށް އާސަންދައިގެ އުސޫލުތައް ބަދަލުކުރެއްވުމަށް ނިންމަވާފައިވާ ކަމަށެވެ. މީގެ އިތުރުން ރާއްޖެއިން ބޭރުގެ ހޮސްޕިޓަލްތަކުގައި، އެއް ހޮސްޕިޓަލުން އަނެއް ހޮސްޕިޓަލަށް ބަލިމީހާ ބަދަލުކުރުމުގައި ބަލިމީހާގެ ބަލަދުވެރިންގެ އަތުން ކުރަންޖެހޭ ޚަރަދުތައްވެސް އާސަންދައިގެ ތެރޭން ހަމަޖެހޭނެ ގޮތް ހަމަޖައްސައި ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

Advertisement

މީގެ އިތުރުން ރައީސުލްޖުމްހޫރިއްޔާ ވިދާޅުވީ، ފާޓިލިޓީ ކެއާއަށް ހާއްސަ ސެންޓަރެއް ޤާއިމް ކުރައްވައި،  އަދި އެކަމަށް ހާއްސަ 30 މިލިއަން ރުފިޔާގެ ފަންޑެއް ދައުލަތުގެ ބަޖެޓުގެ ތެރެއިން ޤާއިމް ކުރައްވާނެ ކަމަށެވެ. ރައީސުލްޖުމްހޫރިއްޔާ ވިދާޅުވީ މިސަރުކާރުގެ ސިޔާސަތަކީ ބަލިޖެހުމުގެ ކުރިން ރައްޔިތުން ބަލިން ރައްކާތެރިކޮށްދެއްވުމަށް ކަމަށެވެ.

އާސަންދައިގެ ތެރެއިން މިކަންކަމަށް ޚަރަދު ކުރުމަށް ރައީސް ނިންމެވި އިރު، ކުރީ ސަރުކާރުގައި ޒަކާތުފަންޑުންނާއި އެންސްޕާއި ބޯންމެރޯގެ ޚަރަދުތައް ހަމަޖައްސައިދެމުންއައެވެ. އަދި ހަމައެގޮތަށް ސްޕެޝަލިސްޓް ޑޮކްޓަރުން ރިކުއެސްޓްކުރާ މެޑިކަލް ޗެކަޕްތަކަށްވެސް އާސަންދައާ އެންސްޕާއިން އެހީތައް ދެއްވަމުން އައެވެ.

އަލަށް މިގެނެވޭ ބަދަލާއި އެކު އަނެއްކާވެސް އާސަންދައަށް ދައުލަތުން ކުރާ ހޭދައިތުރުވެ ދައުލަތުގެ ބަޖެޓަށް ބުރަ ބޮޑުވެގެން ދާނެއެވެ.