ކުރީގެ ސަރުކާރުތަކުން އަތޮޅުތަކުގައި އަޅާފައިވާ ހައުސިންގ ޔުނިޓްތަަކުގެ އަގުތައް ސަރުކާރުން ކުޑަކޮށްފިއެވެ.

މިއަދު ބޭއްވި ވަޒީރުންގެ މަޖިލީހުގެ ނިންމުންތަކާއި ގުޅޭ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، ހައުސިން ވައުދުތައް ފުރިހަމަ ކުރުމަށް ވަޒީރުންގެ މަޖިލީހަށް ހުށައެޅި ކަރުދާހަށް މަޝްވަރާކުރެއްވުމަށް ފަހުގައި، އަތޮޅުތަކުގައި މިހާރު އަގުބޮޑުކޮށް ދީފައި ހުރި ހައުސިންގ ޔުނިޓްތައް 3330ރއަށް ކުޑަކުރެއްވުމަށް ނިންމަވާފައިވާ ކަމަށެވެ. 

ރައީސުލްޖުމްހޫރިއްޔާ ވިދާޅުވީ، އަތޮޅުތަކުގައި ދޫކޮށްފައި ހުރި ހައުސިން ޔުނިޓްތަކުގެ ތެރޭގައި 5000 ވުރެ ބޮޑުކޮށް މަހުކުލި ދައްކަންޖެހޭ ތަންތަން ހުރި ކަމަށެވެ. އެހެން ކަމުން އަލަށް ސަރުކާރުން މިގެނައި ބަދަލާއިއެކު، މިހާރު 3330ރ އަށް ވުރެ ބޮޑު ކުއްޔެއް ދައްކަންޖެހޭ ހުރިހާ ތަންތަނެއްގެ ކުލިވެސް 3330ރއަށް ކުޑަވެގެންދާނެ ކަމުގައި ރައީސް ވިދާޅުވިއެވެ.

މީގެ އިތުރުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ، މިހާރުވެސް އަތޮޅުތަކުގައި ގާތްގަނޑަކަށް 2500ރ މަހުކުލި ދައްކާ ގޮތަށް ދޫކޮށްފައިވާ ހައުސިންގ ޔުނިޓްތައް ހުންނާނެ ކަމަށެވެ. އެތަންތަނުގެ ކުލި ބޮޑު ނުވާނެ ކަމުގައިވެސް ރައީސް ވިދާޅުވިއެވެ.

އަތޮޅުތަކުގައި އަޅާފައި ހުރި ހައުސިންގ ޔުނިޓްތަކުގެ ކުލި ބޮޑުވުމަކީ، ރިޔާސީ އިންތިޚާބުގެ ތެރޭގައި، ޑރ. މުއިއްޒަށް ރައްޔިތުންގެ ފަރާތުން ހުށައަޅާފައިވާ ޝަކުވާއެކެވެ.

ހިޔާ ފްލެޓާއި އަތޮޅުތަކުގައި އަޅާފައި ހުރި ހައުސިންގ ޔުނިޓްތަކުގެ އަގު ކުޑަކުރެއްވުމުގެ އިތުރުން، ސޯޝަލް ހައުސިންގެ ފުލެޓްތަކާއި ހައުސިން ޔުނިޓްތަކުގެ ކުލި ނުދެއްކިގެން ވެފައިވާ ހުރިހާ ޖޫރިމަނާއެއް މައާފްކޮށްދެއްވާނެ ކަމުގައިވެސް ރައީސް ވަނީ ވިދާޅުވެފައެވެ.