އަނގައިން ނުބައި ވަސް ދުވުން، ނުވަތަ ނޭވާލާއިރު ނުބައި ވަސް ހުރުމަކީ ބައެއް ފަހަރު އަޅުގަނޑުމެންނާ ކުރިމަތިވާ ސިއްހީ މައްސަލައެކެވެ. ގިނަ މީހުންނަށް މިއީ އާންމު ކަމަކަށް ނުވިނަމަވެސް، އަބަދުހެން އަނގައިން ނުބައި ވަސްދުވާ މީހުން ވެސް އަޅުގަނޑުމެންގެ ތެރޭގައި އުޅެއެވެ. މިކަމުގައި އޮތް އެންމެ ބޮޑު ލަދުވެތިކަމަކީ، ބައެއް މީހުންނަށް އެކަން އަމިއްލައަށް ދެނެނުގަނެވުމެވެ. ނޫންނަމަ، އެހެން މީހުން އެވާހަކަ ނުދައްކާތީ އެކަން އެހެން މީހުންނަށް ނޭންގޭނެކަމަށް ބަލައި، އެ މައްސަލައަށް ހައްލެއް ހޯދުމަށް މާ ބޮޑު ސަމާލުކަމެއް ނުދެވުމެވެ. 

މައްސަލައިގެ އަނެއް ކޮޅަށް ބަލާލާއިރު، މިފަދަ ސިއްހީ މައްސަލައެއް ދިމާވެފައިވާ މީހަކަށް، އޭނާއަށް އެކަން އަމިއްލައަށް ދެނެގަނެވިފައިވޭތޯ ޔަގީންކުރުމުގެ ގޮތުން ސުވާލު ކުރުމަކީ، ކައިރީގައި އުޅޭ އެކުވެރިންނަށް ވެސް ގިނަ ފަހަރު ފަސްޖެހެވޭ ކަމެކެވެ. އޭގެ ބަދަލުގައި އަޅުގަނޑުމެންގެ ތެރެއިން ބައެއް މީހުން، މި ވާހަކަ ހިއްސާ ކުރަން ޖެހޭ މީހާއާއި ހިއްސާ ނުކޮށް، އެހެން މީހުންގެ ކައިރީގައި މިވާހަކަ ދެއްކުމުން، އެ މީހަކަށް އިތުރު ލަދުވެތިކަމަކާ ކުރިމަތިލާން ޖެހިދާނެތީއެވެ.  

އަނގައިން ނުބައިވަސް ދުވުމުގެ ސަބަބުތަކަކީ ކޮބާ؟

މިކަމާ ގުޅޭ ގޮތުން ހާވަޑް މެޑިކަލް ސްކޫލުން ޝާއިޢުކޮށްފައިވާ ލިޔުމެއްގައި ބުނާގޮތުން، މި ވަސް އުފެދެނީ ހަމައެކަނި އަނގައިގެ އެތެރެއަކުން ނޫނެވެ. އަނގައިގެ ބޭރުން މި ވަސް އުފެދުމުގެ ފުރުސަތު ވެސް އޮވެއެވެ. އެގޮތުން މި ވަސް އުފެދޭ މައިގަނޑު ސަބަބުތަކުގެ ތެރޭގައި، ދަތްޕިލައިގައި އުފެދޭ ބެކްޓީރިއާ އާއި ދުލުގެ ހަރުލާފައި ހުންނަ ކާއެއްޗެހި ހިމެނެއެވެ. އެހެންކަމުން، މި މައްސަލަ ގުޅިފައިވަނީ އަނގައިގެ ސާފުތާހިރުކަމާއި، ހިރުގަނޑަށްޖެހޭ ބަލިތަކަށާއި، އަނގަ ތެތްކޮށް ބެހެއްޓުމަށް ބޭނުންވާ މިންވަރަށް ކުޅު ނުއުފެއްދި، އަނގަތެރެ ހިކުމާއެވެ. އެހެންކަމުން މިފަދަ މައްސަލައެއް ކުރިމަތިވެއްޖެނަމަ އެންމެ ރަގަޅު ގޮތަކީ ވީއެންމެ އަވަހަކަށް ދަތުގެ ނުވަތަ އެތެރެ ހަށީގެ ޑޮކްޓަރެއްގެ މަޝްވަރާ ހޯދުމެވެ.

މި ސަބަބުތަކުގެ އިތުރުން، މި މައްސަލަ ކުރިމަތިވެދާނެ އިތުރު ހާލަތްތަކެއް ވެސް ހުރެއެވެ. އެއީ މެޔާއި ކިޑްނީއަށް ޖެހޭ ބޮޑެތި ބަލިތަކުގެ ސަބަބުންނާއި، ހަކުރު ބަލި ކޮންޓްރޯލްނުވެ އެ ބަލި ބޮޑުވުމުގެ ސަބަބުންވެސް އަނގައިން ނުބައިވަސް ދުވައިފާނެއެވެ. މިފަދަ ހާލަތްތަކުގައި ބަލީގެ އިތުރު އަލާމާތްތައްވެސް ފެންނާނެއެވެ. 

އަނގައިން ނުބައިވަސް ދުވުމުގެ މައްސަލަ ހައްލުކުރާނީ ކިހިނެއް؟

އަނގައިން ނުބައިވަސް ދުވުމުގެ މައްސަލަ ދިމާވާ އެއް ސަބަބަކީ އަނގައިގެ ސާފުތާހިރުކަން ނެތުމުންކަމަށް ވުމުން، މިކަން ހައްލު ކުރުމަށް އަމިއްލައަށް ކުރެވޭނެ ބައިވަރު ކަންކަން ހުރެއެވެ. އެގޮތުން ގޭގައި ކުރެވޭނެ ބައެއް ކަންކަން ހިއްސާކޮށްލާނަމަވެ.

1.     ދުވާލަކު މަދުވެގެން ދެ ފަހަރު، އަދި ކޮންމެ ކެއުމަކަށް ފަހު ދަތް އުނގުޅުން.

2.     ދުންފަތުގެ އިސްތިއުމާލު ކުރުން ހުއްޓާލުން.

3.     އަނގަ ދޮވުމަށް ޙާއްސަ ފެނެއް (މައުތު ވޮޝް) ބޭނުންކޮށްގެން، ނިދުމުގެކުރިން އަނގަދޮވުން.

4.     އަނގަ ހިކޭނަމަ ގިނައިން ފެނާއި ދިޔައިތަކެތި ބުއިމަށް އާދަކުރުން. ނުވަތަ އަނގަ ހިކުމުން ރައްކާތެރިކޮށްދޭ ސްޕްރޭ، ޖެލް ނުވަތަ ފެންފަދަތަކެތި ބޭނުންކުރުން. މިގޮތަށް ހައްލެއް ނުލިބިއްޖެނަމަ، ޑޮކްޓަރަކާ މަޝްވަރާކޮށް ޑޮކްޓަރީ ބޭހަށް ދިއުން އެދެވިގެންވޭ.

5.     ދަތުގެ މައްސަލަ ހުންނަނަމަ، ދަތުގެ ޑޮކްޓަރަށް ގަވާއިދުން ދެއްކުން. ދަތުގެ މައްސަލަތަކަކީ އަނގައިން ނުބައި ވަސް ދުވުމުގެ އެންމެ އާންމު ސަބަބު.