ޑިމޮކްރެސީގެ ހަމަތައް ނެގެެހެއްޓުމަށް ކަމަށް ބުނެ ރައީސް ނަޝީދާއި އެމަނިކުފާނަށް ތާއީދު ކުރައްވާ ފަރާތްތަކުން އުފެއްދެވި ޕާޓީގެ ދަ ޑިމޮކްރެޓްސްގެ އިންތިޚާބުގެ ނަތީޖާތައް އާއްމު ކުރުމުގައި އަރާފައިވާ އޮޅުންތަކަށް އެޕާޓީން މަޢާފަށް އެދިއެއްޖެއެވެ.

ދަ ޑިމޮކްރެކްޓްސްގެ އިންތިޚާބުގެ ވަގުތީ ނަތީޖާ އިއުލާނުކޮށްދެއްވީ، މެދު ހެންވޭރު ދާއިރާގެ މެމްބަރު ޢަލީ އާޒިމެވެ. ޢަލީ އާޒިމް އެކްސްގައި ކުރައްވި ޕޯސްޓެއްގައި ވިދާޅުވީ،  ރޭގައި ވަގުތީ ނަތީޖާ އިއުލާން ކުރިއިރު ދެންނެވިން 4 ރަށެއްގެ ފޮށީގެ ނަތީޖާ ނުލިބޭ ވާހަކަ ދެންނެވި ކަމަށާއި، ވަގުތީ ނަތީޖާގައި މިހާރު އެ ހަތަރު ފޮށީގެ ވޯޓު ހިމަނާފައިވާ ކަމަށެވެ. އަދި ރޭގައި ބާތިލް ވޯޓުގެ އަދަދު 50 ކަމަށް ދެންނެވުނީ އޮޅުމަކުން ކަމަށާއި، ރަނގަޅު ގޮތަކީ ބާތިލް 25 ވޯޓްކަމަށާއި އެކަމަށް ވަރަށް ބޮޑަށް މަޢާފަށް އެދޭ ކަމުގައި އާޒިމް ވިދާޅުވިއެވެ.

ވޯޓުލުން ނިމުނުތާ 28 ގަޑިއިރު ފަހުން، ދަ ޑިމޮކްރެޓްސްއިން އެޕާޓީގެ އެތެރޭގެ އިންތިޚާބުގެ ވަގުތީ ނަތީޖާ އިޢުލާނު ކުރި އިރު، އިންތިޚާބު އޮޅުވާލާފައިވާ ކަމަށް އެޕާޓީގެ ބައެއް މެމްބަރުންވެސް ތުހުމަތުކޮށްފައިވެއެވެ. އެމްޑީޕީގެ އެތެރޭގެ އިންތިޚާބުގެ ވޯޓުގައި ރައީސްގެ މަޤާމުގެ ވޯޓުގެ އަދަދުތަކާއި ބާޠިލް ވޯޓުގެ އަަދަދު ދިމާ ނުވާކަން ފާހަގަކުރެވިގެން ދިޔައެވެ.  ބާތިލް ވޯޓުގެ އަދަދު ދިމާނުވި ސަބަބު ސާފުކޮށްދީ އާޒިމް ވަނީ އެކަމަށް މަޢާފަށް އެދިވަޑައިގެންފައެވެ.

ވަގުތީ ނަތީޖާގެ ޝަކުވާ ހުށަހެޅުމުގެ ފުރުސަތު 5 ޑިސެމްބަރ 14:00 ހަމައަށް ހުޅުވާލާފައިވާ ކަމުގައިވެސް ދަ ޑިމޮކްރެޓްސްއިން ވަނީ ބުނެފައެވެ.