ރައްޔިތުންގެ މަޖިލީހުގެ ނައިބު ރައީސް އިންތިހާބު ކުރަން ރޭ ބޭއްވި ޖަލްސާގައި އެމްޑީޕީ ޕާލިމެންޓަރީ ގުރޫޕް (ޕީޖީ)ން ނެރުނު ތްރީލައިން ވިޕާ ހިލާފުވެފައިވާތީ، ތޮއްޑޫ ދާއިރާގެ މެންބަރު ހަސަން ޝިޔާނާއި ކާށިދޫ ދާއިރާގެ މެންބަރު އަބްދުﷲ ޖާބިރަށް ފިޔަވަޅު އަޅައިދޭން އެދެން ނިންމައިފިއެވެ.

ޕީޖީ ގްރޫޕްގެ ސްޕޯކްޕާސަން ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގް މިއަދު ވިދާޅުވީ ފާޅުގައި ވިޕްލައިނާ ހިލާފުވި ދެ މެންބަރުންގެ މައްސަލަ އެމްޑީޕީއަށް ހުށަހަޅުއްވާނެ ކަމަށް ޕީޖީ ލީޑަރު، އަލިފުށީ ދާއިރާގެ މެންބަރު މުހައްމަދު ރަޝީދު ވިދާޅުވެފައިވާ ކަމަށެވެ.

ރޭ ބޭއްވި ޖަލްސާގައި މަޖިލީހުގެ ނައިބު ރައީސްކަމަށް އެމްޑީޕީގެ ފަރާތުން ވާދަކުރަން، އެ ޕާޓީގެ ޕީޖީ ގްރޫޕުން ހޮވީ ހޯރަފުށީ ދާއިރާގެ މެންބަރު އަހްމަދު ސަލީމްއެވެ. އެ ނިންމުމާ އެއްގޮތަށް ސަލީމްގެ ނަން ހުށަހަޅާފައިވަނިކޮށް ޝިޔާން ވަނީ ޖާބިރުގެ ނަން ހުށަހަޅާފައެވެ. އެ ނަމަށް ތާއީދުކުރެއްވީ ގައްދޫ ދާއިރާގެ ދަ ޑިމޮކްރެޓްސް މެންބަރު އަހުމަދު ޒާހިރެވެ. 

ވޯޓުގައި ސަލީމަށް ވޯޓު ދޭން ވިޕް ނެރެފައިވަނިކޮށް، ޖާބިރުގެ ނަން ހުށަހެޅުއްވީ އެ ނިންމުމާ ހިލާފަށެވެ. އެކަމަށް ޖާބިރު ތާއީދު ކުރައްވައި ވާހަކަވެސް ދެއްކެވިއެވެ.

ރޭ ނެގި ވޯޓުން ސަލީމް ކާމިޔާބުކުރެއްވީ 51 މެމްބަރުންގެ ވޯޓުންނެވެ. ޖާބިރަށް ލިބިވަޑައިގެންނެވީ 23 ވޯޓެވެ.