ކީރިތި ޤުރުއާން ކިޔެވުމުގެ ޤައުމީ މުބާރާތައް ޙައްޤު ދަރަޖައާއި މަޤާމު ހޯއްދަވައިދެއްވާނެ ކަމަށް އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ. މި މުބާރާތަކީ ރާއްޖޭގައި ބާއްވާ އިސްލާމީ އެންމެ ބޮޑު ޤައުމީ އެއް ޙަރަކާތެވެ.

މިނިސްޓަރ ޝަހީމް ވިދާޅުވީ ޤުރުއާން މުބާރާގެ ކަންކަން މިހާރަށްވުރެ ހަރުދަނާކުރެއްވުމަށް، ކުރަންޖެހޭ މަސައްކަތްކުރެއްވުމަށް ޚާއްޞަ ކޮމިޓީއެއް ހަމަޖައްސަވާފައިވާ ކަމަށެވެ. ކީރިތި ޤުރުއާން ކިޔެވުމުގެ 36 ވަނަ މުބާރާތް، އަންނަ ފެބްރުއަރީމަހު ބޭއްވުމަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ.

މުބާރާތް ކުރިއަށްދާނީ ފެބުރުއަރީ 23އިން ފެށިގެން، މަރޗް މަހުގެ 2ވަނަ ދުވަހާއި ހަމައަށެވެ. ކީރިތި ޤުރްއާން ކިޔެވުމުގެ ޤައުމީ މުބާރާތަކީ 1981 ވަނަ އަހަރުން ފެށިގެން ސަރުކާރުން ބާއްވަމުން އަންނަ މުބާރާތެކެވެ. މި މުބާރާތަކީ ދިވެހިންގެ ހިތްތަކުގައި ކީރިތި ޤުރްއާން ކިޔެވުމަށް ލޯބިޖައްސައި ޤުރްއާން ކިޔެވުމުގެ ފަންނު އާލާކޮށް، ދިރުވައި، ފެތުރުމަށް މަސައްކަތްކުރުމުގެ ގޮތުން ކީރިތި ޤުރުއާނާ ބެހޭ ޤައުމީ މަރުކަޒުން އިންތިޒާމްކޮށްގެން ކުރިއަށްގެންދާ މުބާރާތެކެވެ.

މުބާރާތުގައި ބައިވެރިވުމުގެ ފުރުޞަތު އަތޮޅުތަކުގެ ސްކޫލްތަކާއި މުވައްސަސާތަކަށް ހަމަހަމަކަމާއެކު ލިބިގެންދެއެވެ. މިއަހަރުގެ މުބާރާތުގައިވެސް ޙާފިޒުންގެ ބަޔާއި، ސްކޫލް ކުދިންގެ ބަޔާއި، މުއައްސަސާތަކުގެ ބައި ހިމެނެއެވެ.