މާލޭ ސިޓީގެ މޭޔަރުކަމަށް ކުރިމަތި ލެއްވުމުގައި ކަނޑައެޅުއްވި އެންމެ މުހިއްމު އަމާޒަކީ، މާލެއަކީ މީހުން ދިރިއުޅޭ ހިތުން ދިރިއުޅޭނެ އުފާވެރި ސިޓީއެއްގެ ގޮތުގައި ހެއްދެވުން ކަމުގައި، މާލޭ ސިޓީގެ މޭޔަރުގެ އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާ އާދަމް އާޒިމް ވިދާޅުވެއްޖެއެވެ.

"ނޫން ޑޮޓް އެމްވީ"އަށް ދެއްވި ބަސްދީގަތުމުގައި އާޒިމް ވިދާޅުވީ، މާލެއަކީ ތަފާތު ގިނަ އެކި މައްސަލަތައް ފުނިޖެހިފައިވާ އަދި މީހުން ދިރިއުޅުމަށް އެތައް ގިނަ އުނދަގޫތަކަކާއި ތަކްލީފްތަކެއް އުފުލަންޖެހިފައިވާ ސިޓީއެއް ކަމަށެވެ. އަދި މާލޭގައި ހުރި މައްސަލަތަކާއި އެމައްސަލަތައް ހައްލުކުރުމުގައި ކުރިމަތިވާނެ ގޮންޖެހުންތަކުގެ ބޮޑުކަމަށް ބަލައި، މާލޭގައި ހުރި މައްސަލަތައް ހައްލު ނުކުރެވޭނެ ކަމަށްވެސް ބައެއް ފަރާތްތަކުން ދެކޭ ކަމުގައި އާޒިމް ވިދާޅުވިއެވެ.

އާޒިމް ވިދާޅުވީ، މާލޭ ސިޓީ ކައުންސިލްގެ މޭޔަރުކަމަށް ކުރިމަތިލެއްވީވެސް އެގޮންޖެހުންތަކާއި ކުރިމަތިލައްވައިގެން ކާމިޔާބު ހޯއްދެވުމުގެ ޢަޒުމުގައި ކަމަށެވެ. އަދި މާލޭގައި މިހާރު ހުރި މައްސަލަތަކަކީ ހައްލު ނުވާނޭ މައްސަލަތަކެއް ކަމަށް ބަލައިގެން ދޫކޮށްލެވޭނެ މައްސަލަތަކެއް ނޫންކަމުގައިވެސް އާޒިމް ވިދާޅުވިއެވެ.

އާޒިމް ވިދާޅުވީ، މާލޭގައި މިހާރު ހުރި ބޮޑެތި މައްސަަލަތަކުގެ ތެރޭގައި، ޕާކިން މައްސަލައަކީ އެންމެ އިސްކަންދޭނެ ކަންތައް ކަމަށެވެ. އާޒިމް ވިދާޅުވީ، މާލޭގައި އުޅަނދުތައް ގިނަކަމުން މާލޭގައި ދިރިއުޅެންވެސް އުނދަގޫވެފައިވާ ކަމަށެވެ. އެހެންކަމުން ފުރަތަމަކަމަށް ޕާކިން މައްސަލަތަކަށް ހައްލު ހޯއްދަވައި ދެއްވާނެ ކަމުގައި އާޒިމް ވިދާޅުވިއެވެ. 

އާޒިމް ވިދާޅުވީ ކޮންމެ ދަތިކަމަކާއި އެކު އެއަށް ހައްލު ހޯދޭނެ ގޮތްތައްވެސް އޮންނާނެ ކަމަށެވެ. އެހެންވެ ކޮންމެ އުނދަގޫ ހާލަތަކުން އަރައިގަންނަން މަސައްކަތް ކުރަންޖެހޭ ކަމަށާއި، މިވަގުތު މާލޭގެ ހާލަތަކީ އުނދަގޫ ހާލަތެއްކަމުގައިވެސް އާޒިމް ވިދާޅުވިއެވެ. އަދި މާލޭގެ މައްސަލަަތައް ހައްލުކުރުމަކީ އުނދަގޫ ކަމެއް ކަމަށް ބަލައި، އެކަމަކާކުރިމަތި ނުލައި ފަސޭހަ ކަންކަން އެކަނިކުރަން ކިޔަވައިގެން ތިބި މީހުންވެސް ބޭނުން ވާނަމަ އެއީ ޒިންމާދާރުގޮތެއް ނޫންކަމުގައިވެސް އާޒިމް ވިދާޅުވިއެވެ. 

މާލެ ސިޓީގެ މޭޔަރުކަމަށް އާދަމް އާޒިމް ކުރައްވާ ކެމްޕޭނުގެ ތެރެއިން އެމަނިކުފާނު މިހާރު ގެންދަވަނީ، މާލޭގެ ކުރިމަގަށް އެމަނިކުފާނު ގެންގުޅުއްވާ ތަޞައްވަރުތަކާއި އުއްމީދުތައް ހާމަކުރައްވަމުންނެވެ.