ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިއާދަކުރަނިވި ހަކަތަކަމުގައި ހެދުމަކީ ވަރަށް ފަސޭހައިން ޙާސިލްކުރެވިދާނެ ކަމެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ތުރުކިޔޭއާއި ޔޫއޭއިއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު ރާއްޖެވަޑައިގެން، ރާއްޖޭގެ މީޑިއާތަކާއި ބައްދަލުކުރައްވައި ނޫސްވެރިންގެ ސުވާލުތަކަށް ޖަވާބު ދެއްވަމުންނެވެ.

ރައީސުލްޖުމްހޫޫރިއްޔާ ޑރ މުޙައްމަދު މުޢިއްޒު ވިދާޅުވީ، މިސަރުކާރުގެ އަމާޒަކީ މިދައުރު ނިމުގެ ކުރިން ރާއްޖޭގައި ބޭނުން ކުރާ ހަކަތައިގެ 33 އިންސައްތައަކީ އިއާދަކުރަނިވި ހަކަތަ ކަމުގައި ހެއްދެވުމަށެވެ. އަދި އެކަން ހާސިލްކުރުމަށް ކަނޑައަޅާފައި ވަނީ ފަންޑު ހޯދައިގެންނާއި އިންވެސްޓްްމެންޓްތައް އިތުރުކޮށްގެން ކަމުގައި ރައީސުލްުޖުމްހޫރިއްޔާ ވިދާޅުވިއެވެ.

ރައިސުލްޖުމްހޫރިއްޔާ ވިދާޅުވީ، މިހާރު ބޭނުންކުރާ ހަކަތައިގެ 33 އިންސައްތަ އިއާދަކުރަނިވި ހަކަތައަށް ބަދަލުކުރުމަށްޓަކައި، ބޭނުންވަނީ 600 މިލިއަންޑަރުކަމަށެެވެ. އަދި ފަސް އަހަރުތެރޭގައި އެއަމާޒަށް ވާޞިލްވެވޭނެކަމުގައި ޔަޤީންކުރައްވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރާއްޖޭގައި މިހާތަނަށް  ހިންގުނު އިޢާދަކުރަނިވި ހަކަތައިގެ އެންމެ ބޮޑު މަޝްރޫޢުއަކީ ހައިވޭފައި ސޯލާޖަހައިގެން ހަކަތަ އުފެއްުދުމަށް ހިންގާ މަޝްރޫއެވެ. ކުރީ ސަރުކާރުން ފެށި އެމަޝްރޫޢުގެ ދަށުން ހައިވޭގައި ޖަހާފައިވާ ސޯލާތައް ނަގާނެކަމަށް މިސަރުކާރުން ވަނީ ބުނެފައެވެ. އޭގެ ސަބަބެއް ކަމަށް ބުނެފައި ވަނީ ހައިވޭގެ ސީވިއު ސޯލާ ޕެނަލްތަކުގެ ސަބަބުން ގެއްލޭތީ ކަމަށެވެ.