ރާއްޖޭގައި ތިބި އިންޑިއާ ސިފައިން އަނބުރާ ގެންދިޔުމަށް އިންޑިއާއިން އެއްބަސްވެފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެންވިދާޅުވީ، ދެޤައުމަކަށް އެމަނިކުފާނު ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހުގައި މިއަދު މާލެ ވަޑައިގެން، ވެލާނާ އެއާޕޯޓުގައި ރާއްޖޭގެ މީޑިއާތަކާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއިން އިންޑިއާ ސިފައިން ފޮނުވާލުމާއި ގުޅޭ ކަންކަމުގައި އެޤައުމުގެ އިސްފަރާތްތަކާއި އެކު މިހާތަނަށް ހަތަރު ފަސް ބައްދަލުވުމެއް ބޭއްވިފައިވާ ކަމަށެވެ. އަދިވެރިކަމާއި ހަވާލުވެވަޑައިގެންނެވުމަށްފަހު، ޖެހިގެން އައި ނޮވެމްބަރު މަހުގެ 18 ވަނަ ދުވަހު، އިންޑިއާ ސިފައިން އަނބުރާ ގެންދިޔުމަށް ދިވެހި ސަރުކާރުން އިންޑިއާ ސަރުކާރުގައި ރަސްމީކޮށް އެދިފައިވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، މިހާރު ކުރެވެމުން ދަނީ އިންޑިއާ ސިފައިން ރާއްޖެއިން އަނބުރާ ގެންދިޔުމާއި ގުޅޭ ޓެކްނިކަލް މަސައްކަތްތައް ކަމަށެވެ. މީގެ އިތުރުން ވަގުތުން ވަގުތަށް ކަންކަން ނިންމޭފަދަ ހައިލެވެލް ކޮމިޓީއެއް އެކުލަވާލުމަށް މިހާރު ނިންމިފައިވާ ކަމުގައިވެސް ޑރ. މުއިއްޒު ވިދާޅުވިއެވެ.

ރައީސް ޑޮކްޓަރ މުއިއްޒު ވިދާޅުވީ، ޑިޕްލޮމެޓިކް އުސޫލުގެ ތެރެއިން، ރާއްޖެއިން އިންޑިއާ ސިފައިން ބޭލުމުގެ ކަންކަން ވަރަށް އަވަހަށް ހައްލުވެގެންދާނޭ ކަމަށް އުއްމީދު ކުރައްވާ ކަމަށެވެ. އަދި ރާއްޖޭގައި މިހާރު ހިނގަމުންދާ މަޝްރޫޢުތައްވެސް އަވަސް ކުރެވިގެންދާނެ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ކުރެއްވި ކެމްޕޭންތަކުގައި އެންމެ ބޮޑަށް ދެއްކެވި ވާހަކަފުޅަކީ، ރާއްޖޭގައި ތިބި އިންޑިއާ ސިފައިންގެ ސަބަބުން ޤައުމީ ސަލާމަތާއި މިނިވަންކަމަށް ނުރައްކާވުމުގެ ވާހަކައެވެ. އަދި ރާއްޖެއިން އިންޑިއާ ސިފައިން ފޮނުވާލުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ.