ތުރުކީވިލާތަށާއި، ޔުނައިޓެޑް އަރަބް އެމިރޭޓްސް (ޔޫ.އޭ.އީ.) އަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު, ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު މެންދުރުފަހު މާލެ ވަޑައިގެންފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިމަހުގެ 26 އިން 28އަށް ތުރުކީ، ވިލާތަށް ކުރެއްވި ދަތުރުފުޅަކީ، އެޤައުމުގެ ރައީސް، ރަޖަބް ޠައްޔިބް އުރްދުޣާންގެ ދަޢުވަތަކަށް ކުރެއްވި ފުރަމާނަ ދަތުރުފުޅެކެވެ. މިދަތުރުފުޅުގައި، ދެޤައުމުގެ ސަރުކާރުގެ މެދުގައި ރަސްމީ ވާހަކަތައް ބާއްވަވައި، ދެ ޤައުމުގެ މެދުގައި އިތުރަށް ގުޅުން ބަދަހިކުރުމާއި ގުޅޭ މަޝްވާރަތައް ކުރެއްވިއެވެ.

ތުރުކީއަށް ކުރެއްވި ފުރަމާނަ ދަތުރު ނިންމަވާލެއްވުމަށްފަހު، ކޮޕް-28ގައި ބައިވެރިވެވަޑައިގެންނެވުމަށް، ދުބާއީއަށް ވަޑައިގެންނެވީ، ނޮވެމްބަރު މަހުގެ 28 ވަނަ ދުވަހުގައެވެ. ކޮޕްސަމިޓްގައި ޤައުމުތަކުގެ އެންމެ އިސްވެރިންގެ ބައްދަލުވުމުގައި، ރާއްޖޭގެ ފަރާތުން ބަޔާން އިއްވެވީވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މީގެ އިތުރުން މި ސަމިޓްގައި ބައިވެރިވެވަޑައިގެންނެވި، ދުނިޔޭގެ ޤައުމުތަކުގެ ލީޑަރުންނާއި ބައްދަލުވުމުގެ ހަވާސާގައި ރައީސް ޑރ. މުޙައްމަދު މުޢިއްޒު ބައްދަލުކުރައްވައި މަޝްވަރާތައް ކުރެއްވި ކަމުގައި ރައީސުލްޖުމްހޫރިއްޔާގެ އޮފީހުން ވަނީ ހާމަކޮށްފައެވެ.