އިންގްލިޝް ޕްރިމިއަރ ލީގުގައި ހޮނިހިރު ދުވަހުގެ ރޭ ނިއުކާސްލް ޔުނައިޓެޑުން މެންޗެސްޓަރ ޔުނައިޓެޑް 1-0 އިން ބަލިކޮށްފިއެވެ. ދުވަސް ފެށުނުއިރު ނިއުކާސްލް އޮތީ ޔުނައިޓެޑުގެ ފަހަތުން، ލީގުގެ އަށްވަނައިގައެވެ. ނަމަވެސް ޔުނައިޓެޑާ ދެކޮޅަށް ނިއުކާސްލް އިން މި ހޯދި 3 ޕޮއިންޓާއެކީ އެ ޓީމު ވިމަނީ 14 މެޗުން ޖުމްލަ 26 ޕޮއިންޓާއެކީ ފަސްވަނައަށް ކުރިޔަށް ޖެހިލާފައެވެ. 

ނިއުކާސްލްގެ އެސްޓީ ޖޭމްސް ޕާކްގައި ކުޅުނު މި މެޗުގައި ނިއުކާސްލްގެ ހަމައެކަނި ގޯލު ކާމިޔާބުކޮށްދިނީ މެޗުގެ 55 ވަނަ މިނެޓުގައި އެ ޓީމުގެ ޒުވާން ކުޅުންތެރިޔާ އެންތޮނީ ގޯޑަންއެވެ. މި ގޯލާއެކީ މުޅި މެޗުގެ ކޮންޓްރޯލް ނިއުކާސްލްއިން ނެގި ނަމަވެސް، އެ ޓީމުގެ ކީޕަރ، ނިކް ޕޯޕުގެ ކޮނޑުހުޅަށް 82 ވަނަ މިނެޓުގައި ލިބުނު އަނިޔާއަކާ ގުޅިގެން، ޔުނައިޓެޑުން އުފެއްދި ހަމަލާތައް ގޯލަކަށް ބަދަލު ނުކުރެވި ދިޔައީ ކިރިޔާއެވެ. ޕޯޕްގެ އަނިޔާއާއެކީ، ނިއުކާސްލްގެ އަނިޔާގެ ލިސްޓު ދިގުވެ، އެ ޓީމަށް މިވަނީ އުނދަގޫ ދުވަސްތަކަކާ ކުރިމަތިލާންޖެހިފައެވެ.

މީގެ އިތުރުން، ހޮނިހިރު ދުވަހު ވޮލްވަރ ހެމްޕްޓަން ވޮންޑަރސްއާ ދެކޮޅަށް ކުޅުނު މެޗު ކާމިޔާބުކޮށް، އާސެނަލް އިން ވަނީ 4 ޕޮއިންޓަށް ލީގުގެ އެއްވަނައިގައި ލީޑު ފުޅާކޮށްފައެވެ. މެޗުގެ ވަރަށް ކުރީކޮޅު، 6 ވަނަ މިނެޓާއި 13 ވަނަ މިނެޓުގައި ބުކަޔޯ ސަކާ އަދި މާޓިން އޮޑެގާޑު ކާމިޔާބުކުރި ގޯލުތަކާއެކީ އެ ޓީމު އޮތީ މެޗު ނިމުމާ ގާތަށް ދިޔައިރުވެސް 2 ގޯލުގެ ލީޑެއްގައެވެ. ވޫލްވްސްގެ ހަމައެކަނި ގޯލު ފެނިގެން ދިޔައީ މެޗުގެ 86 ވަނަ މިނެޓުގައެވެ. އެއީ ނެލްސަން ސެމެޑޯ އެ ޓީމަށް ކާމިޔާބުކޮށްދިން ގޯލެކެވެ. 

ލީގުގެ ރެލިގޭޝަން ޒޯންގައި އޮތް ބާންލީ އާއި އެވަޓަންވެސް ވަނީ ރަގަޅު ނަތީޖާތަކެއް ހޯދާފައެވެ. ބާންލީއިން އެމީހުންގެ ޓާފް މޫރް ސްޓޭޑިއަމްގައި ޝެފީލްޑް ޔުނައިޓެޑް 5-0 ބަލިކުރިއިރު، މިއީ މި ސީޒަންގައި އެ ޓީމުން އަމިއްލަ ދަނޑުގައި ހޯދި ފުރަތަމަ ކާމިޔާބީއެވެ. އަދި އެވަޓަންވަނީ 1-0 އިން ނޮޓިންހަމް ފޮރެސްޓް ބަލިކޮށް، ލީގުގެ 18 ވަނައަށް ކުރިޔަށް ޖެހިލާފައެވެ.