މި އަންނަ އަހަރު ޖަރުމަނުގައި ބޭއްވުމަށް ހަމަޖެހިފައިވާ ޔޫރޯ 2024ގެ ގުރުއަތުލުން ރޭ އެ ގައުމުގެ ހެމްބާރގުގައި ބާއްވައިފިއެވެ. ޔޫރޯގެ 17 ވަނަ މުބާރާތް 14 ޖޫން 2024 ގައި ފެށުމަށް ތައްޔާރީތައްވަމުން އަންނައިރު، މި މުބާރާތުގެ ގުރުއަތުލުމުން އެންމެ ފާހަގަ ކުރެވުނު އެއް ކަމަކީ، މުބާރާތުގެ އެންމެ ފަހުގެ ޗެމްޕިއަން އިޓަލީއާ، މުބާރާތުގެ އެންމެ ކާމިޔާބު އެއް ޓީމު ކަމުގައިވާ ސްޕެއިން އެއް ގްރޫޕެއްގައި ހިމެނުމެވެ. 

ސްޕެއިން ވަނީ ޔޫރޯ ފައިނަލުގައި 4 ފަހަރު ކުޅެ 3 ތަށި ހޯދާފާއެވެ. އަދި ޖެހިޖެހިގެން 2 ޔޫރޯ ކާމިޔާބުކުރި ހަމައެކަނި ޓީމަކީ ވެސް ސްޕެއިންއެވެ. އެއީ 2008 ވަނަ އަހަރު އޮސްޓްރިއާ އަދި ސްވިޓްޒަލޭންޑުގައި ބޭއްވި މުބާރާތުގެ ފައިނަލުގައި ޖަރުމަނުގެ މައްޗަށް ކުރި ހޯދައިގެންނާއި، 2012 ވަނަ އަހަރު ޕޮލަންޑު އަދި ޔުކްރެއިންގައި ބޭއްވި މުބާރާތުގެ ފައިނަލްގައި ތަފާތު ބޮޑުކޮށް، 4-0 އިން އިޓަލީ ބަލިކުރުމަށްފަހުއެވެ. އިޓަލީގެ މައްޗަށް ފައިނަލުގައި ސްޕެއިނުން މި ނެރުނު ނަތީޖާއަކީ، ޔޫރޯ ފައިނަލެއްގައި ޓީމަކުން މިހާތަނަށް ހޯދާފައިވާ އެންމެ ބޮޑު ކާމިޔާބީއެވެ. އަދި އިޓަލީއިންވަނީ 4 ފަހަރު ފައިނަލް ކުޅެ 2 މުބާރާތް ކާމިޔާބުކޮށްފައެވެ. އެހެންކަމުން، މި ދެ ޓީމަކީ ވެސް ޔޫރޯ ފުޓުބޯޅަ މުބާރާތުގެ ތާރީހުގައި އެތަކެއް ވާހަކަތަކެއް ލިޔެފައިވާ ދެ ޓީމެވެ.

ޔޫރޯ 2024 ގެ ގުރުއަތު ނެގުން ރޭ އޮތް ނަމަވެސް، މުބާރާތުގައި ވާދަކުރާ 3 ޓީމެއް އަދި ކަށަވަރު ނުވެއެވެ. ޕްލޭއޮފް މެޗުތަކަކަށްފަހު، ޔޫރޯ 2024ގެ ފަހު 3 ޖާގަ ކަނޑައެޅިގެން ދާއިރު، އެ ފުރުސަތު ޕޮލަންޑް، ވޭލްސް، އައިސްލޭންޑް، ޔުކްރޭން އަދި ގްރީސްއަށް ވެސް އެބައޮތެވެ. އެގޮތުން ޕްލޭއޮފްގެ ސެމީފައިނަލް މެޗުތައް ކުޅޭނީ 21 މާޗުގައެވެ. އަދި 3 ފައިނަލް ކުޅޭނީ 26 މާރޗުގައެވެ.

ޔޫރޯ 2024 - ގްރޫޕްތައް ބެހުނު ގޮތް:

ގްރޫޕް އޭ: ޖާރމަނީ، ސްކޮޓްލެންޑް، ހަންގޭރީ އަދި ސްވިޓްޒަލޭންޑް

ގްރޫޕް ބީ: ސްޕެއިން، ކޮރޭޝިއާ، އިޓަލީ އަދި އަލްބޭނިއާ

ގްރޫޕް ސީ: ސްލޮވީނިއާ، ޑެންމާކް، ސަރބިއާ އަދި އިންގްލެންޑް

ގްރޫޕް ޑީ: ނެދަލޭންޑްސް، އޮސްޓްރިއާ، ފްރާންސް އަދި ޕްލޭއޮފް މެޗުން އަންނަ ޓީމް (ޕޮލަންޑް/ވޭލްސް/ފިންލޭންޑް/އެސްޓޯނިއާ)

ގްރޫޕް އީ: ބެލްޖިއަމް، ސްލޮވެކިއާ، ރުމޭނިއާ އަދި ޕްލޭއޮފް މެޗުން އަންނަ ޓީމް (އިޒްރޭލް/ބޮސްނިއާ/ޔުކްރޭން/އައިސްލޭންޑް)

ގްރޫޕް އެފް: ޓާކީ، ޕޯޗުގަލް، ޗެކް ރިޕަބްލިކް އަދި ޕްލޭއޮފް މެޗުން އަންނަ ޓީމް (ޖޯޖިއާ/ގްރީސް/ކަޒަކިސްތާން/ލަގްޒަމްބާގް)

ޔޫރޯ 2024 ޖަރުމަނުގެ 10 ސިޓީއެއްގައި ކުޅުމަށް ހަމަޖެހިފައިވެއެވެ. މުބާރާތް ހުޅުވާ މެޗު ކުޅޭނީ ޖޫން 14 ވަނަ ދުވަހު މިއުނިކްގައެވެ.