ޑިމޮކްރެޓިކް ހަމަތައް ނެގެހެއްޓުމަށް ކަމަށް ބުނެ ރައީސް ނަޝީދު އިސްވެހުންނަވައި އުފެއްދެވި ދަ ޑިމޮކްރެޓްސްގެ އެތެރޭގެ އިންތިޚާބުގެ ނަތީޖާތައް އިޢުލާނު ނުކުރެވި ތުހުމަތުތައް އަމާޒުވެއްޖެއެވެ.

ދަ ޑިމޮކްރެޓްސްގެ ފުރަތަމަ އެތެރޭގެ އިންތިހާބު އިއްޔެ އެޕާޓީން ބާއްވާފައި ވާއިރު، އިންތިޚާބުގެ ވަގުތީ ނަތީޖާ އަދިވެސް އިޢުލާނެއް ނުކުރެއެވެ. އެޕާޓީން ބުނެފައި ވަނީ، އިންތިޚާބުގެ ވަގުތީ ނަތީޖާ މިއަދުގެ ވަގުތެއްގައި އިޢުލާނުކުރާނެ ކަމަށެވެ.

ދަ ޑިމޮކްރެޓްސްގެ އެތެރޭގެ އިންތިޚާބުތަކުގެ ވޯޓުލުން، އިންތިހާބު މިއަދު ހެނދުނު 10:00 އިން ހަވީރު 4:00 އާ ހަމައަށް ކުރިއަށް ކުރިޔަށް ގެންދިޔައިރު، އެއިންތިޚާބުގައި ވޯޓުލާފައި ވަނީ، ފަސްހާހަށް ވުރެ މަދު މީހުންނެވެ. އެހެން ނަމަވެސް އިންތިޚާބުގެ ވަގުތީ ނަތީޖާތައް އިއުލާނުކުރުން ލަސްވެ، ފާޑުކިޔުންތައް އަމާޒުވެފައި ވާއިރު، އެޕާޓީގެ ރައީސް ކަމުގެ މަޤާމަށް ވާދަކުރެއްވި، ހަސަން ލަޠީފާއި، ޙުސައިން އަމްރުވެސް ވަނީ ކާމިޔާބު ލިބުނުކަން އިޢުލާނު ކުރައްވާފައެވެ.

ދަ ޑިމޮކްރެޓްސްގެ އެތެރޭގެ އިންތިޚާބު ބާއްވާފައި ވަނީ، އެޕާޓީގެ ރައީސް، ތިން ނައިބު ރައީސުންނާއި، ވިމެން ޑިމޮކްރެޓްސް ލީޑަރު، ވިމެން ޑިމޮކްރެޓްސް ޑެޕިއުޓީ ލީޑަރު، ޔަންގް ޑިމޮކްރެކްޓްސް ލީޑަރު އަދި ޔަންގް ޑިމޮކްރެޓްސް ޑެޕިއުޓީ ލީޑަރު ހޮވުމަށެވެ.

އިންތިޚާބުގެ ވަގުތީ ނަތީޖާތައް އިއުލާނުކުރުން ދަ ޑިމޮކްރެޓްސްއިން ލަސްކުރުމާއި ގުޅިގެން އެޕާޓީގެ މެމްބަރުންނާއި އާއްމު އެހެން ފަރާތްތަކުންވެސް ވަނީ އިންތިޚާބު އޮޅުވާލާކަމުގެ ތުހުމަތުތައްވެސް ކޮށްފައެވެ. 

ދަ ޑިމޮކްރެޓްސްއަކީ، އެމްޑީޕީގެ ތެރޭގައި ތިއްބެވި ރައީސް ނަޝީދުގެ ސަޕޯޓަރުން އެމްޑީޕީގައި ޑިމޮކްރެޓިކް ހަމަތައް ނެތްކަމަށް ބުނެ އުފެއްދި ޕާޓީއެކެވެ. އެޕާޓީގެ ފަރާތުން ރިޔާސީ އިންތިޚާބުގައި ވާދަކުރެއްވި އިލްޔާސް ލަބީބަށް ލިބިވަޑައިގަތީ 15000 ވޯޓެވެ. އެއީ ވޯޓުލީ މީހުންގެ %7 އެވެ.