މާލޭ ސިޓީގެ މޭޔަރުގެ މަޤާމަށް ވާދަކުރައްވާނެ އެމްޑީޕީގެ ކެންޑިޑޭޓުގެ ގޮތުގައި އާދަމް އާޒިމް ކަނޑައަޅައި އެމްޑީޕީގެ ޓިކެޓް އާދަމް އާޒިމަށް އެޕާޓީން ދީފިއެވެ.

މާލޭ ސިޓީގެ މޭޔަރުގެ މަޤާމަށް ވާދަކުރައްވާނެ އެމްޑީޕީގެ ކެންޑިޑޭޓުގެ ގޮތުގައި އާދަމް އާޒިމަށް އެމްޑީޕީން ޓިކެޓް ދިނީ، އެޕާޓީގެ ފަރާތުން ޕާޓީގެ ޓިކެޓް ދިނުމަށް ބޭއްވުމަށް ކަނޑައެޅި ޕްރައިމަރީގައި އިތުރު ފަރާތަކުން ވާދަކުރެއްވުމަށް ހުށައަޅާފައި ނުވާތީއެވެ.

މީގެ އިތުރުން، މާލޭގެ ސިޓީކައުންސިލްގެ އަނެއް ތިންދާއިރާއަކަށް ޓިކެޓް ދިނުމަށް އިއުލާނު ކުރި ޕްރައިމަރީއަށްވެސް އެދާއިރާތަކުގައި ވާދަކުރެއްވުމަށް ކެންޑިޑެންސީ ހުށައެޅުއްވީ އެންމެ ބޭފުޅެއް ކަމުގައިވާތީ ޕްރައިމަރީއެއް ނުބާއްވައި އެދާއިރާތަކުންވެސް ވަނީ ޕާޓީގެ ޓިކެޓް ދީފައެވެ.

މިގޮތުން އެމްޑީޕީގެ ޓިކެޓް ދީފައިވަނީ:

މާލޭ ސިޓީގެ މޭޔަރުގެ މަޤާމަށް: އާދަމް އާޒިމް / މ. ސީނުކަރަންކާގެ، މާލެ

މާލޭ ސިޓީ ކައުންސިލްގެ މެދު ހެެންވޭރު ދާއިރާގެ ގޮނޑިއަށް: އަޙްމަދު ރިޝްވާން ރަޝީދު / ހ. ވޭމައުތު، މާލެ

މާލޭ ސިޓީ ކައުންސިލްގެ ހެންވޭރު ދެކުނު ދާއިރާގެ ގޮނޑިއަށް: ޙައްވާ ނިޙްލާ / ހ. ތަރްބޫޒުގެ،  މާލެ

މާލޭ ސިޓީ ކައުންސިލްގެ މާފަންނު ދެކުނު ދާއިރާގެ ގޮނޑިއަށް: އަޙުމަދު ޢިމްރާން / މ. ފަޅުމަތީގެ ، މާލެ

މާލޭ ސިޓީގެ މޭޔަރުގެ މަޤާމު ހުސްވީ ކުރިން އެމަޤާމުގައި ހުންނެވި، ޑރ. މުޙައްމަދު މުޢިއްޒު، ރިޔާސީ އިންތިޚާބުގައި ވާދަކުރައްވައި، ރައީސުލްޖުމްހޫރިއްޔާގެ މަޤާމަށް ހޮވިވަޑައިގެންނެވުމާއި ގުޅިގެންނެވެ. އަދި މާލެ ސިޓީ ކައުންސިލްގެ 3 ދާއިރާއެއްގެ ގޮނޑިތައް ހުސްވީ، އެދާއިރާގެ މެމްބަރުންގެ ގޮތުގައި ތިއްބެވި ބޭފުޅުން ރައީސުލްޖުމްހޫރިއްޔާ، ޑރ. މުހައްމަދު މުޢިއްޒު އައު ސަރުކާރުގެ ސިޔާސީ މަޤާމުތަކަށް ޢައްޔަނުކުރެއްވުމާއި ގުޅިގެންނެވެ.

މާލޭ ސިޓީގެ މޭޔަރު ހޮވުމަށް ބާއްވާ ބައި-އިލެކްޝަން ބޭއްވުމަށް އިލެކްޝަންސް ކޮމިޝަނުން ނިންމާފައި ވަނީ އަންނަ ޖެނުއަރީ މަހުގެ 13 ވަނަ ދުވަހުގައެވެ.