ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލްގެ އެވޯޑް ނުވަތަ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ޖެހިޖެހިގެން 4 ވަނަ ފަހަރަށް ރާއްޖެއަށް ލިބިއްޖެއެވެ. ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑު ރާއްޖެއަށް ލިބުނުކަން އިއުލާންކުރެއްވީ ދުބާދީގެ "ބްރުޖް އަލް އެރެބް" ހޮޓެލްގައި ވޯލްޑް ޓްރެވެލް އެވޯޑްސްގެ ދުނިޔޭގެ ވަނަތަކަށް އެވޯޑް ދިނުމަށް ރޭ ބޭއްވި ގްރޭންޑް ފައިނަލް ހަފްލާގައެވެ.

މިފަހަރުވެސް މި އެވޯޑް ރާއްޖެއިން ހޯދީ ވާދަވެރި އެހެން މަންޒިލްތަކާއި ވާދަކޮށެވެ. ވޯލްޑްސް ލީޑިން ޑެސްޓިނޭޝަންގެ އެވޯޑަކީ، މި އެ އެވޯޑް ރަސްމިއްޔާތުގެ އެންމެ ޝަރަފުވެރި އެވޯޑެވެ.

މި ހަފްލާގައި ރާއްޖެއަށާއި ރާއްޖޭގެ ފަތުރުވެރިކަމުގެ ސިނާއަތަށް ޚިދުމަތްދޭ އަމިއްލަ ފަރާތްތަކަށްވެސް މުޅި ދުނިޔޭގެ އެއްވަނައިގެ ގޮތުގައި ވަނީ އެވޯޑްތައް ލިބިފައެވެ. ތިރީސް ވަނަ ޓްރެވަލް އެވޯޑްގައި ދުނިޔޭގެ ކެޓަގަރީން ރާއްޖެއަށް މި އަހަރު 11 އެވޯޑެއް ލިބުނެވެ.

މީގެ އިތުރުން އިންޑިޔާ ކަނޑުގެ ސަރަހައްދުން 22 އެވޯޑެއް ވެސް ރާއްޖެއަށް ލިބުނެވެ. އެގޮތުން ވިދިވިދިގެން 4 ވަނަ ފަހަރަށް "ވޯލްޑްސް ލީޑިން ޑެސްޓިނޭޝަން" އެވޯޑް ރާއްޖެއިން ހާސިލްކުރުމުގެ އިތުރަށް އަލަށް ދޭންފެށި ރިސެލިއެންސް އެވޯޑް ހާސިލްކުރި 5 ޤައުމުގެ ތެރޭގައި ރާއްޖެ ހިމެނުނެވެ.

މީގެ އިތުރުން ވޯލްޑްސް ލީޑިން ޓޫރިސްޓް ބޯޑު 2023 ގެ ގޮތުގައި މޯލްޑިވްސް މާކެޓިން އެންޑް ޕަބްލިކް ރިލޭޝަން، އެމް.އެމް.ޕީ.އާރް.ސީ ހޮވުމުގެ އިތުރުން ސްޕެޝަލް އެޗީވްމަންޓް އެވޯޑް 2023 ލިބުނީވެސް އެމްއެމްޕީއާރްސީގެ ކުރީގެ ސީއީއޯ ޠައްޔިބު މުހައްމަދަށެވެ. ވޯލްޑްސް ލީޑިން ސީޕްލޭން އޮޕަރޭޓަރުގެ އެވޯޑް ލިބުނީ ޓީ.އެމް.އޭ އަށެވެ.

މިހަފްލާގައި ވަނީ "ޓްރެވެލް ޕާސަނަލިޓީ އޮފް ދަ އިޔަރ 2023" އެވޯޑް ކުރީގެ ޓުއަރިޒަމް މިނިސްޓަރ ޑރ.ޢަބްދުﷲ މަޢުޞޫމަށް ލިބިވަޑައިގެންފައެވެ. "ޓްރެވެލް ޕާސަނަލިޓީ އޮފް ދަ އިޔަރ 2023" އެވޯޑް ހާސިލްކުރެއްވުމަށްފަހު ޑރ.މަޢުސޫމް ޓްރެވެލް ނިއުސް ނެޓްވޯކަށް ދެއްވި އިންޓަރވިއުއެއްގައި ރާއްޖޭގެ އަދި ދުނިޔޭގެ ފަތުރުވެރިކަމުގެ ދާއިރާގައި ޝާމިލްވާ އެންމެންނަށް ޝުކުރު އަދާކުރައްވާ އެވޯޑްވަނީ އެފަރާތްތަކަށް ޑެޑިކޭޓް ކޮށްފައެވެ.