މިހާރު ޔޫއޭއީގައި ކުރިޔަށްދާ ކޮޕް-28 ސަމިޓަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޑައިގެން އުޅުއްވަނިކޮށް، އިންޑިއާގެ ނޫސްވެރިއަކު، ސުވާލުކުަރަމުން ހިނގައިފިއެވެ.

ސަމިޓް ބާއްވާ ހޯލުގެ ބޭރުން ރައީސުލްޖުމްހޫރިއްޔާ އާއި ދިވެހިރާއްޖޭގެ ވަފުދުގައި ހިމެނޭ ބޭފުޅުން ހިންގަވާފައި ވަޑައިގަންނަވަނިކޮށް، އިންޑިއާ ޓުޑޭގެ ނޫސްވެރިޔާ، ގީތާ މޯހަންއެވެ. އޭނާ ރައީސް ޑރ. މުހައްމަދު މުއިއްޒާއު ސުވާލުކުރަމުން ހިނގާފައި ވަނީ، ސަމިޓް ކުރިޔަށްދާ ހޯލަށް އެމަނިކުފާނު ވަޑައިގެންނެވުމުގެ މަގުމަތީގައެވެ. މިކަން ހިނގާފައި ވަނީ އިންޑިއާގެ ބޮޑުވަޒީރާ ރައީސުލްޖުމްހޫރިއްޔާ ކޮޕް-28ގެ ހަވާސާގައި ބޭއްވި ބައްދަލުވުމުގެ ކުރިންނެވެ.

އިންޑިއާ ޓުޑޭގެ ނޫސްވެރިޔާ ގީތާ މޯހަން، ރައީސުލްޖުމްހޫރިއްޔާ އާއި ސުވާލުކުރައްވާފައި ވަނީ، ރާއްޖޭގައި ތިބި އިންޑިއާ ސިފައިން ބޭރު ކުރައްވާނެކަމުގައި ރައީސް ވިދާޅުވެފައި ވާއިރު، އިންޑިއާގެ ކިބައިން ރާއްޖެއިން އުއްމީދުކުރާ ކަމަކާއި ގުޅޭ ގޮތުންނެވެ. 

އިންޑިއާގެ ނޫސްވެރިޔާއަށް ޖަވާބު ދެއްވަމުން ރައީސް ޑރ. މުޙައްމަދު މުޢިއްޒު ވިދާޅުވީ، ދެޤައުމުގެ ދެމެދުގައި ރަނގަޅު ގުޅުމެއް އެބައޮތް ކަމަށެވެ.

ރާއްޖޭގައި ތިބި އިންޑިއާ ސިފައިން ބޭރުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. އަދި ހުވާކުރުމުގެ ރަސްމިއްޔާތަށް ވަޑައިގެންނެވި އިންޑިއާގެ ސައިންސް މިނިސްޓަރާއި އަދި ސަފީރާއި ބައްދަލުކުރެއްވުމުގައި އިންޑިއާ ސިފައިން ރާއްޖެއިން ފޮނުވާލުމާއި ގުޅޭ ގޮތުން މަޝްވަރާތައް ކުރެއްވި ކަމުގައިވެސް ސަރުކާރުން ވަނީ ބުނެފައެވެ.

ރައީސުލްޖުމްހޫރިއްޔާގެ މަޤާމަށް ޑރ. މުޙައްމަދު މުޢިއްޒު ވެރިކަން ހޯއްދެވީ، އިންޑިއާއާއި ދެކޮޅަށް ސިޔާސީ ގޮތުން ގިނަ ވާހަކަތަކެއް ދައްކަވައިގެންނެވެ. އަދި އެކަމުގެ ސަބަބުން އިންޑިއާ އާއި ރާއްޖޭގެ ގުޅުން ވަނީ ގޯސްވެގެން ގޮސްފައެވެ.