ދިވެހިރާއްޖެއިން އެޗްއައިވީ ޖެހިފައި ހުރި މީހަކު ފެނުނުތާ 32 އަހަރު މިއަހަރު ފުރުނުއިރު، މިހާތަނަށް ރާއްޖެއިން އެބަލި ޖެހުނު މީހުންގެ އަދަދު 40އަށް އަރާފައިވާ ކަމުގައި އެޗްޕީއޭއިން ބުނެފިއެވެ.

ރާއްޖެއިން އެންމެ ފުރަތަމަ އެޗްއައިވީ ޖެހިފައިވާ މީހަކު ފެނުނީ 1991 ވަނަ އަހަރުގައެވެ. މިދިޔަ އަހަރުގެ ނިޔަލަށް ރާއްޖެއިން އެޗްއައިވީ ޖެހިފައި ވަނީ 40 މީހުންނަށެވެ. އޭގެ ތެރޭގައި ހިމެނެނީ 6 އަންހެނުންނާއި، 34 ފިރިހެނުންނެވެ.

އޭގެތެެރެއިން 15 މީހުން މިހާރު ނިޔާވެފައިވާއިރު، ރާއްޖޭގައި އެބައްޔަށް ފަރުވާ ހޯދަމުންދާ 22 މީހުން މިހާރު އެބަތިއްބެެވެ.

އެންމެ ފުރަތަމަ 2000ގެ ކުރީކޮޅާއި ހަމައަށް ދިވެހިންނަށް އެޗްއައިވީ ޖެހެމުން އައީ ރާއްޖެއިން ބޭރަށް ކުރާ ދަތުރުތަކުގެ ސަބަބުން ކަމުގައި ވީނަމަވެސް، މިހާރު ރާއްޖޭގެ އެތެރޭގައި ދަނީ ބަލި ފެތުރެމުންނެވެ. 

އެޗްއައިވީއަކީ މުޅިން ފަސޭހަކުރެވޭ ބައްޔެއް ނޫންނަމަވެސް، އެބަލީގެ އެންމެ ފަހުގެ ފަރުވާއިން، ބައްޔާއެކު އާއްމު އާދައިގެ ދިރިއުޅުމެއް އުޅެވެއެވެ. މިބައްޔަށް ދެވޭ އެންމެ ފަހުގެ ފަރުވާއަކީ އެންޓިރެޓްރޯ ވައިރަލް ޓްރީޓްމެންޓް ކަމުގައި ވާއިރު، މިފަރުވާއަކީ، 2004 ވަނަ އަހަރުންފެށިގެން ރާއްޖޭގައި މުލިން ހިލޭ ފޯރުކޮށްދެވޭ ފަރުވާއެކެވެ.

މިއަދަކީ، ބައިނަލްއަޤުވާމީ ގޮތުން ފާހަގަކުރާ ދުނިޔޭގެ އެއިޑްސް ދުވަހެވެ.