ކުރީގެ ސަރުކާރުތަކުގައި، 2030 ވަނަ އަހަރު އަންނައިރު، ދިވެހިރާއްޖެއަކީ، ކާބަން ނިއުޓްރަލް ޤައުމަކަށް ހެދުމަށް ކަނޑައަޅާފައިވާ އަމާޒާއި ޚިލާފަށް، މިސަރުކާރުގެ 5 އަހަރު ނިމޭއިރު، ބޭނުންވަނީ ރާއްޖޭގައި އުފައްދާ ހަކަތައިގެ 33 އިންސައްތަ އިއާދަކުރަނިވި ހަކަތައަށް ބަދަލުކުރަން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޔޫއޭއީގައި އިއްޔެފެށި، ކޮޕް-28 ސަމިޓްގައި ރާއްޖޭގެ ބަޔާން އިއްވަވައި ދެއްކެވި ވާހަކަފުޅުގައެވެ. މީގެ ކުރިން ބޭއްވުނު ކޮޕްސަމިޓްތަކުގައި ދިވެހި ސަރުކާރުގެ ފަރާތުން ހާސިލްކުރަން ބޭނުންވާ ލަނޑުދަނޑިއަކީ، 2030 ވަނަ އަހަރު އަންނައިރު ދިވެހިރާއްޖޭގައި ބޭނުންކުރާ ހަކަތައަކީ، މުޅިންވެސް އިއާދަކުރަނިވި ހަކަތައަށް ހެދުމުގެ ލަނޑުދަނޑިކަން ވަނީ އިޢުލާނުކޮށްފައެވެ. އެހެންނަމަވެސް ކޮޕް-28ގައި ރާއްޖޭގެ ބަޔާން އިއްވަވައިދެއްވަމުން ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވީ،  ދިވެހި ސަރުކާރުގެ އަމާޒަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ އުފައްދައިދޭނެ އިޢާދަކުރަނިވި ހަކަތައިގެ ނިޒާމެއް ކުރިއަށް އޮތް ފަސް އަހަރުގެ ތެރޭގައި ޤާއިމުކުރުން ކަމަށާއި،  ދިވެހިރާއްޖެއިން ކަނޑައަޅާފައިވާ ލަނޑުދަނޑިއަކީ މަދުވެގެން 600 މިލިއަން ޑޮލަރު މިކަމަށް ހޯދުންކަމަށެވެ. އަދި މިހާތަނަށް އައިރު، ރާއްޖޭގައި އުފެއްދޭ ޖުމުލަ ހަކަތައިގެ ތެރެއިން އިއާދަކުރަނިވި ހަކަތައިގެ ނިސްބަތަކީ އެންމެ %4 ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ދުނިޔޭގެ ޤައުމުތަކުގެ ވެރިން ބައިވެރިވެވަޑައިގަންނަވާ މިބައްދަލުވުމުގައި، ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، މޫސުމަށް އަންނަ ބަދަލުތަކުގެ ނޭދެވޭ އަސަރު ކުޑަކުރުމަށް ޤައުމުތަކުން އަޅާ ފިޔަވަޅުތައް ވަޒަންކުރާ "ގްލޯބަލް ސްޓޮކްޓޭކް" އިން، ޕެރިސް އެއްބަސްވުމާ އެއްގޮތަށް، ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްގައި ހިފެހެއްޓުމަށް އަމާޒު ހިފަންޖެހޭ ކަމަށާއި، އެއީ ކޮޕް28އަށް ރާއްޖެއިން ކުރާ އުންމީދު ކަމަށެވެ. 

މީގެ އިތުރުން، މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށް ފައިސާ ހޯދުމަށް ކުރިމަތިވާ އުނދަގޫތައް ހައްލު ކުރުމުގެ މުހިންމުކަން ފާހަގަކުރައްވަމުން، އެ މަސައްކަތް ބިނާވާންޖެހޭނީ ޤައުމުތަކުގެ މެދުގައި ހަމަހަމަ، އަދި ލިބެންހުރި އެންމެ ރަނގަޅު ސައިންޓިފިކް ހޯދުންތަކުގެ މައްޗަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން، ފަސޭހައިން ފައިސާ ހޯދޭނެ ނިޒާމެއް ޤާއިމްވާން ޖެހޭ ކަމަށާއި، ފައިސާ ދިނުމުގައި ބަލާ މިންގަނޑުތައްވެސް އަލުން މުރާޖަޢާކުރަން ޖެހޭކަން ރައީސުލްޖުމްހޫރިއްޔާގެ ވާހަކަފުޅުގައި ވަނީ ވިދާޅުވެފައެވެ.

ޔުނައިޓެޑް އެރެބް އެމިރޭޓްސް (ޔޫ.އޭ.އީ)ގެ ދުބާއީގައި މިހާރު ކުރިއަށްދާ 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގެ އެހެން ޤައުމުތަކުގެ އިސްވެރިންވެސް ވަނީ، ތިމާވެށީގެ މައްސަލަތަކާއި ގުޅޭ ގޮތުން އެޤައުމުތަކުގެ ބަޔާންތައް ހުށައަޅުއްވާފައެވެ.