ނިއުޒީލެންޑުގެ ވެރިރަށް ވެލިންޓަންގެ ހޮސްޓެލްއެއް ކަމުގައިވާ، ލޯފަރސް ލޮޖްގައި ގަސްދުގައި ރޯކޮށްލި ކަމުގެ ތުހުމަތަށް މީހަކު ހައްޔަރުކޮށް އޭނާގެ މައްޗަށް ދެ ދަޢުވާއެއް އުފުލައިފިއެވެ.

އަންގާރަ ދުވަހުގެ ފަތިހު ނިއުޓައުންގެ އަވަށުގައި ހުންނަ ލޯފަރސް ލޮޖްގެ މަތީ ފަންގިފިލާގައި އަލިފާނުގެ ހާދިސާއެއް ހިނގައި، އެހޮސްޓެލްގައި ދިރިއުޅުނު 6 މީހަކު ވަނީ މަރުވެފައެވެ.

ހަތަރު ފަންގިފިލާ ހުންނަ، އެ ހޮސްޓެލްގައި 92 ކޮޓަރި ހުންނައިރު އެ އިމާރާތަށް ބޮޑެތި ގެއްލުންތަކެއް ވަނީ ލިބިފައެވެ.

މިހާތަނަށް ތަޙްޤީޤުތަކަށް ފާހަގަވެފައި ވަނީ އެ ހޮސްޓެލްގައި ރޯވީ ގަސްދުގައި މީހަކު ހުޅުޖެހުމުން ކަމަށެވެ. އަދިވެސް މިހާދިސާގެ ތަޙްޤިޤުތައް ކުރިޔަށްދާއިރު، ރޯވި ހޮސްޓެލްގައި އަލިފާނުގެ ހާދިސާއަކުން ރައްކާތެރިވުމަށް އަޅަންޖެހޭ ފިޔަވަޅުތައް އަޅާފައި ނުވުމާއި އެ އިމާރާތްކުރުމުގައި ބިލްޑިންގ ކޯޑާ ޚިލާފުކަން ކަމާއި ބެހޭ ފަރާތްތަކަށް ވަނީ ފާހަގަކުރެވިފައެވެ.