ޔޫއެފާ ޔޫރޮޕާ ލީގުގެ ގްރޫޕް-ބީގައި ބުރާސްފަތި ދުވަހުގެރޭ އޭއީކޭ އެތެންސް އަދި ބްރައިޓަން އެންޑް ހޯލްވްސް ބައްދަލުކުރި މެޗު 1-0 އިން ބްރައިޓަން ކާމިޔާބުކޮށްފިއެވެ. ގްރީސްގައި ކުޅުނު މި 

މެޗު ކާމިޔާބުކުރުމުން ބްރައިޓަންއަށް މި ވަނީ ގްރޫޕްގެ އެއްވަނަ ނުވަތަ ދެވަނަ ލިބޭނެކަން ކަށަވަރުވެފައެވެ. ނަމަވެސް އެ ޓީމު ދެން ދަތުރުކުރާނީ ސީދާ “ނޮކް-އައުޓް” ބުރަށްތޯ ނުވަތަ  “ނޮކް-އައުޓް” ޕްލޭއޮފް މެޗަށްތޯ ޔަގީންވާނީ ގްރޫޕް ސްޓޭޖުގެ ފަހު ބުރުގެ މެޗުތައް ނިމުމުންނެވެ.

ޔޫރޮޕާ ލީގު މިހާރު ކުޅެމުންދާ ގޮތަށް ބަލާއިރު، ސީދާ ދެވަނަ ބުރަށް ދަތުރުކުރާނީ ކޮންމެ ގްރޫޕަކުން އެއްވަނަ ހޯދާ ޓީމުތަކެވެ. އަދި ކޮންމެ ގްރޫޕަކުން ދެވަނައަށްދާ ޓީމު ޕްލޭއޮފް މެޗެއް ކުޅެންޖެހެއެވެ. ޕްލޭއޮފް މެޗު ކުޅެންޖެހޭނީ، ޗެންޕިއަންސް ލީގުގެ ގްރޫޕް ސްޓޭޖުން 3 ވަނައަށް ދާ ޓީމުތަކުގެ ތެރެއިން ޓީމަކާއެވެ. 

އެތެންސްއާ ދެކޮޅަށް ބްރައިޓަންއަށް މެޗުގައި ރަގަޅު ކުޅުމެއް ނުދެއްކުނު ނަމަވެސް، ލިބުނު ޕެނަލްޓީއެއްގެ ބޭނުން ހިފައި، މުބާރާތުގައި ކުރިޔަށް ދިއުމުގެ އުންމީދު، ބްރައިޓަން އިން މިވަނީ އައުކޮށްފައެވެ. މިއީ ޖާއޯ ޕެޑްރޯއަށް ކުރި ފައުލަކުން ލިބުނު ޕެނަލްޓީއަކަށް، ދެވަނަ ހާފުގައި އޭނާ ކާމިޔާބުކުރި ގޯލެކެވެ. 

މީގެ އިތުރުން، ގްރޫޕް-އީގައި ލަސްކްއާ ބައްދަލުކުރި މެޗު ލިވަޕޫލުންވަނީ 4-0 އިން ކާމިޔާބުކޮށް، ގްރޫޕްގެ އެއްވަނަ ޔަގީން ކޮށްފައެވެ.