މިހިނގާ އެޕްރީލް މަހާ އަދި ޖެހިގެން އަންނަ މެއި މަހަކީ ރާއްޖެއަށް މި އަހަރު އެންމެ ހޫނު ގަދަވާނެ ދުވަސްތައް ކަމުގައި ކަމާ ބެހޭ އިދާރާތަކުން ލަފާކޮށްފައިވާތީ, ކަރަންޓު ބޭނުން ކުރުމުގައި އިތުރަށް ސަމާލުވުމަށް ސްޓެލްކޯއިން އިލްތިމާސް ކޮށްފިއެވެ.

މިކަމާ ގުޅިގެން ސްޓެލްކޯއިން އިތުރަށް ފާހަގަ ކުރާ ގޮތުގައި, މި ދުވަސްވަރު ޖައްވު ހޫނުވުމުގެ ސަބަބުން ގޭބިސީތަކުގައި ކަރަންޓު ބޭނުންކުރާ މިންވަރު, ހާއްސަކޮށް ރޭގަނޑު ގަޑީގައި އިތުރުވެ, އެ ކުންފުނިން ކަރަންޓު އުފައްދާ މިންވަރު ވެސް ވަނީ އިތުރުވެފައެވެ. އަދި ހޫނު މޫސުމާ ރޯދަ މަހާ ދިމާވެފައިވުމަކީ ކަރަންޓު ބޭނުންކުރާ މިންވަރު އިތުރު ވެގެން ގޮސްފައިވާ ދެވަނަ ސަބަބުކަން އެ ކުންފުނިން ފާހަގަ ކުރެއެވެ.

ހާލަތު މިހެން އޮތް ނަމަވެސް, ކަރަންޓު އިސްރާފުކުރުން މަދުކޮށް އިގްތިސާދު ކުރެވޭނެ ގޮތަކަށް ރާވާ, ކަރަންޓު ޚަރަދު ކުޑަކުރުމަށް އިތުރަށް މަސައްކަތް ކުރުމަށް ސްޓެލްކޯއިން ވަނީ އިލްތިމާސް ކޮށްފައެވެ.