މަކަރާއި ހީލަތުން އެތައް މިލިޔަން ރުފިޔާއެއް އެތައް ބައެއްގެ އަތުން ހޯދުމުގެ ކުށުގައި، ހަސަން މަމްދޫހު (މަންޑޭ) ގެ މައްޗަށް 200 ވުރެ ގިނަ ދައުވާ އުފުލޭނެ ކަަމުގައި ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

ޕީޖީ މިހެން ވިދާޅުވީ، ޕީޖީއިން ކުރިޔަށް ގެންދާ ބައެއް މައްސަލަތަކާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައެވެ.

ނޫސްވެރިންގެ ބައްދަލުވުމުގައި ޕީޖީ ވިދާޅުވީ، ކޭޕާކު އެޕާޓްމަންޓްތައް ވިއްކުމުގެ ނަމުގައި އޮޅުވާލައިގެން މަމްދޫހު އެތައް ބައެއްގެ އަތުން އެތައް މިލިޔަން ރުފިޔާއެއް ހޯދައި އެފައިސާ އަމިއްލަ ބޭނުން ތަކަށް ބޭނުންކޮށްފައިވާ ކަމަށެވެ. އަދި އޭނާގެ މައްޗަށް ދައުވާ ކުރުމަށް އަންނަ ހަފްތާގައި ކޯޓަށް ފޮނުވާނެ ކަމަށާއި، ޖުމުލަ 225 ދައުވާއެއް މަންޑޭގެ މައްޗަށް އުފުލޭނެ ކަމުގައި ޕީޖީ ވިދާޅުވިއެވެ.

މަންޑޭގެ މައްޗަށް އުފުލާ މައިގަނޑު ދައުވާތަކުގެ ތެރޭގައި ، ސައްޙަ ނޫން ލިޔެކިޔުން އުފެއްދުމާއި، އޮޅުވާލުމާއި، ޓެކުމާއި އަދި މަނީލޯންޑަރިންގެ ކުށެވެ. ޕީޖީ ވިދާޅުވާ ގޮތުގައި މަންޑޭ ހިންގާފައިވާ ކުށުގެ އަމަލުކަށް ކުރުމަށް ކަނޑައަޅާފައިވަނީ ވަކިވަކި ދަޢުވާތެކެވެ. ތަޙްޤީޤާއި ގުޅޭ މައުލޫމާތު ހާމަކުރައްވަމުން ޕީޖީ ވިދާޅުވީ، ކޭޕާކުގެ އެއް އެޕާޓްމަންޓެއް އެތައް ބަޔަކަށް ވިއްކާފައިވާ ކަމަށެވެ. މިގޮތުން ކޭޕާޚުގެ 41 އެޕާޓްމަންޓް ޖުމުލަ، 107 މީހުންނަށް ވިއްކާފައިވާ ކަމުގައި ތަޙްޤީޤުތަކުން އެނގޭކަމުގައިވެސް ޝަމީމް ވަނީ ވިދާޅުވެފައެވެ.

މަންޑޭގެ މައްޗަށް ކުރެވުނު ތުހުމަތު ތަކާއި ގުޅިގެން ފުލުހުން ހިންގި ތަހުޤީޤުތަކަށް ފަހު އޭނާގެ މުދަލާއި ބައެއް ތަކެތި ވަނީ ހިފަހައްޓާފައެވެ.

ހަސަން މަމްދޫހު (މަންޑޭ) އަކީ، ކޭ-ޕާކު ރެސިޑެންސްގެ އެޕާޓްމަންޓުތައް ހަދާކުންފުނި، ހަންބޯ މޯލްޑިވްސްގެ މައިނޯރިޓީ ޙިއްޞާ ދާރެވެ. އޭނާ އެކުންފުނީގެ ސްކޭމް ހިންގާފައި ވަނީ، ކުންފުނީގެ އެހެން ޙިއްޞާދާރުންނަށްވެސް އޮޅުވާލައިގެންކަމަށް އެކުންފުނިން ވަނީ ބުނެފައެވެ.