ރައީސް ޔާމީންގެ އައު ޕާޓީގެ އަމާޒަކީ 24 ގަޑިއިރު ތެރޭ 3000 ފޯމު ހަމަކޮށް ރަޖިސްޓްރީ ކުރަން ހުށައެޅުން ކަމުގައި އެޕާޓީން ބުނެފިއެވެ.

ރައީސް ޔާމީން އުފައްދަވާ އައުޕާޓީ، ޕީޕަލްސް ނޭޝަނަލް ފްރޮންޓް އުފެއްދުމާއި ގުޅޭ މަސައްކަތްތައް ކުރުމަށް، ރައީސް ޔާމީންގެ ދަރިކަލުން ޒެއިން ޢަބުދުﷲ ޔާމީން ޢަބުދުލްޤައްޔޫމަށް އިލެކްޝަންސް ކޮމިޝަނުން އިއްޔެ ވަނީ ހުއްދަ ދޫކޮށްފައެވެ.

އެޕާޓީގެ ފަރާތުން އަމާޒަކީ، 24 ގަޑިއިރުގެ ތެރޭގައި، 3000 ފޯމު ހަމަކޮށް ޕާޓީ ރަޖިސްޓްރީ ކުރުމަށް އިލެކްޝަންސް ކޮމިޝަނަށް ހުށައެޅުން ކަމަށެވެ. އަދި އެންމެ އަވަހަށް ރަޖިސްޓްރީވާ ސިޔާސީ ޕާޓީއަށް ހަަދައި ޕާޓީގެ މަސައްކަތްތައް އަވަހަށް ފަށައިގަތުމަށް ރާވަމުން އަންނަ ކަމުގައިވެސް އެޕާޓީން ބުންޏެވެ.

ރައީސް ޔާމީން އައު ސިޔާސީ ޕާޓީއެއް އުފެއްދެވުމަށް ނިންމެވީ، ޕީޕީއެމްގައި އެމަނިކުފާނުގެ ބާރު ގެއްލި، އެމަނިކުފާނަށް ސިޔާސީ ގޮތުން ކުރިމަތިވި ގޮންޖެހުންތަކާއި ހުރަސްތަކާއި ގުޅިގެންނެވެ.

ރައީސުލްޖުމްހޫރިއްޔާގެ މަޤާމަށް، ޑރ. މުޙައްމަދު މުޢިއްޒު ވަޑައިގެންނެވީ، ރައީސް ޔާމީންގެ ހިޔަނީގައެވެ. އެހެން ނަމަވެސް ވެރިކަން ލިބިވަޑައިގެންނެވުމާއި، އެކު ޕީޕީއެމްގެ އިސްބޭފުޅުންނާއި ރައީސް ޔާމީނާއި ދެމެދުވަނީ ގުޅުންތައް ހީނަރުވެގެން ގޮސްފައެވެ.