ހިޔާފްލެޓްތަކުގެ ފިނިޝިންއަށް ފްލެޓްތައް ލިބުނު ފަރާތްތަކުން ޚަރަދުކުރި ފައިސާ އަނބުރާ ލިބޭނެ ކަމުގެ ޔަޤީންކަން އެކުންފުނީގެ އައު މެނޭޖިންގ ޑައިރެކްޓަރ އިބްރާހީމް ފަޟުލް ރަޝީދު ދެއްވައިފިއެވެ.

މަޤާމާއި ހަވާލުވެވަޑައިގެންނެވުމަށްފަހު، ފަޟުލް އެކްސްގައި ކުރެއްވި ޕޯސްޓެއްގައި ވިދާޅުވީ، ރައިސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަޢުދުވެވަޑައިގެންނެވި ގޮތަށް، ހިޔާފްލެޓްތައް ހަދަން ޚަރަދުކުރި ފައިސާ ހިޔާ ފްލެޓްތަކުގެ ވެރިންނަށް ލިބޭނެ ކަމުގެ ފުރިހަމަ ޔަޤީންކަން އަރުވާ ކަމަށެވެ. އަދި އެފައިސާ ނުދިނުމަށް މިސަރުކާރުން ނިންމައިފި ކަމަށް ބުނެ ބައެއް އޮންލައިން ނޫސްތަކުން ފަތުރާފައިވާ ވާހަކަތައް، ފަޟުލް ވަނީ ދޮގު ކުރައްވާފައެވެ.

ރިޔާސީ އިންތީޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ، އެމަނިކުފާނަށް ވެރިކަން ލިބިވަޑައިގެންފި ނަމަ ހިޔާފްލެޓްތަކުގެ ވެރިން އެ ފްލެޓްތަކުގެ ފިނިޝިންގއަށް ޚަރަދު ކުރި ފައިސާ އަނބުރައި ދެއްވާނެ ކަމަށް ވަޢުދުވެވަޑައިގެންފައެވެ. އަދި އެގޮތުން އެވްރެޖްކޮށް ކޮންމެ ފްލެޓަކަށް 2 ލައްކަ ރުފިޔާ ދެއްވާނެ ކަމުގައި އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ، ރައީސް ޔާމީނުގެ ސަރުކާރުން ނިންމާފައި އޮތީ ފްލެޓްތައް ލިބޭ ފަރާތްތަކަށް ފްލެޓްތަކުގެ ފިނިޝިންގ ނިންމާފައި ދޭގޮތަށް ކަމަށެވެ. މިގޮތުން އޭރު ނިންމާފައި އޮތީ އެޗްޑީސީން ލޯނެއް ނަގައިގެން ފްލެޓްތަކުގެ ފިނިޝިން ނިންމާގޮތަށް ކަމަށާއި، އެހެން ކަމުން ފްލެޓްތަކުގެ ފިނިޝިންގެ ބަދަލުގެ ގޮތުގައި ފްލެޓްތަކުގެ ވެރިންނަށް 2 ލައްކަ ރުފިޔާ ދޭނީވެސް އެޗްޑީސީން ލޯނު ނަގައިގެން ކަމުގައި ރިޔާސީ އިންތިޚާބުގެ ކެމްޕޭން ތެރޭގައި، ޑރ. މުޙައްމަދު މުޢިއްޒު ވިދާޅުވިއެވެ.

ހިޔާ ފްލެޓްތަކުގެ ވެރިންނަށް ބަދަލުގެ ގޮތުގައި 2 ލައްކައެއްހާ ރުފިޔާދޭނެ ކަމުގެ ޔަޤީންކަން އާބަންކޯގެ އައު މެނޭޖިންގޑައިރެކްޓަރ ދެއްވާފައި ވީ ނަމަވެސް، އެކަމާއި ގުޅޭ ގޮތުން ސަރުކާރުން އިތުރަށް ވާހަކަދައްކާފައެއް ނުވެއެވެ.