ސްޓެލްކޯގެ މެނޭޖިން ޑިރެކްޓަރުގެ މަޤާމާއި ހަވާލުވެ ވަޑައިގެން ފުރަތަމަ މަސައްކަތެއްގެ ގޮތުން މުއިވެޔޮމަގަށް ނެރެފައި ހުރި ޓްރާންސްފޯމަރ ގެ މައްސަލަ ހައްލުކުރެއްވުމުގެ މަސައްކަތް ފަޙްމީ ފައްޓަވައިފިއެވެ.

ސްޓެލްކޯގެ އެކި މަޤާމުތަކުގައި ޚިދުމަތް ކުރެއްވި ޙުސައިން ފަހުމީ ސްޓެލްކޯގެ މެނޭޖިންގ ޑައިރެކްޓަރ ކަމުގެ މަޤާމާއި ހަވާލުވެވަޑައިގެން މަސައްކަތް ފެއްޓެވީ މިއަދުއެވެ. މަސައްކަތަށް ނުކުންނެވުމަށްފަހުގައި ފަހުމީ ވަނީ، ކުންފުނީގެ އިސް ބޭފުޅުންނާއި އެކު މުއިވެޔޮމަގުގައި ހުރި އެކުންފުނީގެ ޓްރާންސްފޯމަރުގެ ހާލަތު ބައްލަވައި ލެއްވުމަށް އެސަރަހައްދަށް ޒިޔާރަތް ކުރައްވާފައެވެ.

ކުރީގެ މާވެޔޮ މިސްކިތުގެ ގޯތި ތެރޭގައި ހުރި އެޓްރާންސްފޯމަރު އެތަނުން ނަގައި މަގުމައްޗަށް ނެރުނީ ވަގުތީ ގޮތުންނެވެ. އެއީ މާވެޔޮމިސްކިތް އަލުން އިމާރާތްކުރުމަށް، ޓްރާންސްފޯމަރު ހުރި ބިން ބޭނުންވުމުގެ ސަބަބުންނެވެ. އެހެން ނަމަވެސް، މާވެޔޮމިސްކިތުގެ މަސައްކަތް ނިމި އެމިސްކިތް ބޭނުންކުރަން ފެށިފަހުންވެސް އެޓްރާންސްފޯމަރު ހުރީ މަގުމަތީގައެވެ.

މުއިވެޔޮމަގަށް ދަތިވާގޮތަށް ހުރި އެ ޓްރާންސްފޯމަރު އެހެން ތަނަކަށް ބަދަލުކުރުމުގެ މަސައްކަތް އެއްމަސްދުވަހުގެ ތެރޭގައި ކޮށްނިންމަވާނެ ކަމުގައި ފަހުމީ ވަނީ ވިދާޅުވެފައެވެ. އެޓްރާންސްފޯމަރު ބަދަލުކުރާނެ ތަނެއް ހަމަޖެއްސުމުގެ މަސައްކަތް އެކުންފުނިން ކުރަމުންދާއިރު، ކުރިން ޓްރާންސްފޯމަރު ހުރި ބިން މިހާރު ވަނީ، މާވެޔޮމިސްކިތުގެ އިމާރާތުގެ ތެރެއަށް ނަގާފައެވެ. އެހެންވެ އެ ޓްރާންސްފޯމަރު ބަހައްޓާނެ އެއްވެސް ޖާގައެއް މިހާރު މާވެޔޮމިސްކިތުގެ ހަރިންމަތެރެއަކު ނެތެވެ.