ދިވެހި ފިލްމް އިންޑަސްޓްރީއަށް މި އަހަރަކީ އުއްމީދީ އަހަރެކެވެ. ކޯވިޑް-19 އާ ގުޅިގެން އޮލިމްޕަސް އެތައް ދުވަހެއް ވަންދެން ބަންދުކޮށްފައި އޮތުމަށްފަހު އަލުން މަރާމާތަށްފަހު ހުޅުވުނީ މިއަހަރުއެވެ. އޮލިމްޕަސް ހުޅުވައިގެން އެންމެ ފުރަތަމަ ވެސް އެޅުވީ ޑާކް ރެއިން އެންޓަރޓެއިމަންޓްގެ ފިލްމެއް ކަމުގައިވާ 'ބީވީމާ' އެވެ. އަދި އަހަރު ނިންމާލަން ވެސް މިއޮތީ ހަމަ ޑާކް ރެއިން އެންޓަރޓެއިމަންޓްގެ ފިލްމަކުންނެވެ. 'ނޮވެމްބަރ' އަކީ ކޯވިޑް-19 ގެ ކުރިން ޝޫޓްކޮށް މަސައްކަތް ނިމި ނޭޅުވި ދެތިން އަހަރެއް ވެފައިވާ ފިލްމެކެވެ. ނަމަވެސް، މި ފިލްމަށް ގިނަބަޔަކު ކުރަމުން އައި އިންތިޒާރަށް ހުއްޓުމެއް ނާދެއެވެ. އެހެންކަމުން، ޑިސެމްބަރ މަހުގެ 04 ވަނަ ދުވަހު އެންމެންގެ އިންތިޒާރަށް ނިމުމެއް އަންނާނެއެވެ.

ޑާކްރެއިން އެންޓަރޓެއިމަންޓަކީ އެންމެ ފެންވަރު ރަނގަޅު ދިވެހި ފިލްމުތައް ބެލުންތެރިންނާ ހަމައަށް ގެނެސްދޭ އެއް ޕްރޮޑަކްޝަން ހައުސްއަށް ހަމަ ޔަގީނުންވެސް ވާނެއެވެ. 'ނޮވެމްބަރ' އަކީ ޑާކް ރެއިން އިން ބުނާގޮތުގައި މިހާތަނަށް އެފަރާތުން އުފައްދާ އެންމެ އަގުބޮޑު ފިލްމެވެ. އެގޮތުން ފިލްމުގެ އަގު މިލިއަނަކަށްވުރެ މައްޗަށް ގޮސްފައިވާއިރު ފިލްމުގެ ގިނަ މަންޒަރުތަކެއް ނަގާފައިވަނީ ސިންގަޕޫރުގައެވެ.

މި ފިލްމުން ވެސް ފެނިގެންދާނީ ޑާކް ރެއިންގެ އެންމެ ހިޓް ޕެއަރ ކަމުގައިވާ ޖުމައްޔިލް އާއި މަޖޫއެވެ. ލޯބީގެ ވާހަކައަކަށް ބިނާކޮށް އުފައްދާ މި ފިލްމަކީ އޮރިޖިނަލް ސްކްރީންޕްލޭ އެއް ކަމަށާއި މި ފިލްމުން މަޖޫގެ މޮޅު އެކްޓިންގއެއް ފެނިގެން ދާނެކަމަށް ޑާކް ރެއިން އިން ބުނެއެވެ. މިހާތަނަށް ޑާކް ރެއިން އިން ގެނެސްދީފައިވާ މަޝްހޫރު ފިލްމުތަކުގެ ތެރޭގައި 'އެންމެ ފަހު ވިންދާ ޖެހެންދެން'،  'ވާށޭ މަށާ އެކީ'، 'މީ ލޯތްބަކީ' ފަދަ ފިލްމުތައް ހިމެނެއެވެ.