Advertisement
ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި އިންޑިއާ ސަފީރު މިއަދު ބޭއްވެވި ބައްދަލުކުރެއްވުމުގެ ތެރެއިން -- ފޮޓޯ؛ މަޖިލިސް
އިންޑިއާ ސަފީރު ރައްޔިތުންގެ މަޖިލީހުގެ ރައީސާއި ބައްދަލު ކުރައްވައިފި
ރާއްޖެއާ އިންޑިއާގެ ގުޅުން ގޯސްވެފައިވާ މިދަނޑިވަޅުގައި، އިންޑިއާ ސަފީރު މުނޫ މުހާވަރު ރައްޔިތުންގެ މަޖިލީހުގެ ރައިސް މުޙައްމަދު އަސްލަމާއި މިއަދު ބައްދަލުކުރައްވައިފިއެވެ.
މިބައްދަލުކުރެއްވުން އޮތީ މިއަދު، ރައްޔިތުންގެ މަޖިލީހުގެ އިދާރާގައެވެ.
ރައްޔިތުންގެ މަޖިލީހުގެ އިދާރާއިން ހާމަކޮށްފައިވާ ގޮތުގައި، ރައްޔިތުންގެ މަޖިލީހުގެ ރައީސާއިއެކު އިންޑިއާ ސަފީރު ބޭއްވެވި މިބައްދަލު ކުރެއްވުމުގައި، ދިވެރާއްޖެއާ އިންޑިއާ އާދެމެދު އޮތް ޒަމާންވީ ރަޙްމަތްތެރިކަމުގެ ގުޅުން އިތުރަށް ބަދަހި ކުރުމާއި ގުޅޭ ގޮތުން ވަނީ މަޝްވަރާކުރައްވާފައެވެ. އަދި ދެޤައުމުގެ ޤާނޫނު ހަދާ މަޖިލީހުގެ މެދުގައި އިތުރަށް ގުޅުން ބަދަހި ކުރުމަށް ކުރެއްވިދާނޭ ކަންކަމާއި ގުޅޭ ގޮތުންވެސް ދެބޭފުޅުން ވަނީ މަޝްވަރާކުރައްވާފައެވެ.
ރާއްޖެއާ އިންޑިއާއަކީ ޒަމާނުއްސުރެ ގާތްގުޅުމެއް އޮންނަ، އަދި އެކި ރޮނގުތަކުން އިންޑިއާއަކީ ރާއްޖެއަށް ގިނަ ގުނަ އެހީތަކެއް ވެދެމުން އަންނަ ޤައުމަކަށްވީ ނަމަވެސް، އައު ސަރުކާރު ވެރިކަމަށް އައުމަށްޓަކައި، އިންޑިއާ އާއި ރާއްޖޭގެ ގުޅުން ކިލަނބުވާފަދަ އެތައް ދޮގުވާހަކަތަކެއް ވަނީ ފަތުރާފައެވެ. އަދި ދިވެހި ސަރުކާރުން އެދިގެން ރާއްޖޭގައި ޤާއިމްވެ ތިބި އިންޑިއާ ސިފައިން ރާއްޖެއިން ފޮނުވާލުމަށްވެސް ސަރުކާރުން އަންނަނީ މަސައްކަތްތައް ކުރަމުންނެވެ.
