ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓަށް އައްޔަންކުރެއްވި ބޭފުޅުންގެ ތެރޭގައި އެހެން އެއްވެސް ޤައުމެއްގެ ޕާސްޕޯޓެއް އޮތް ބޭފުޅަކު ހުންނެވިތޯ ބަލަން މަޖިލީހުގެ ސަރުކާރުގެ މަސްއޫލިއްޔަތު އަދާކުރާ ކޮމިޓީން ނިންމަވައިފިއެވެ.

އައު ސަރުކާރުގެ 22 ވަޒީރުންނަށް ރުހުން ހޯދުމަށް ސަރުކާރުން މަޖިލީހަށް ހުށައެޅުއްވި މައްސަލަ ދިރާސާކުރުމުގެ މަސައްކަތް މަޖިލީހުގެ ކޮމެޓީން ގެންދަވަނީ ކުރައްވަމުންނެވެ.

ކޮމެޓީގެ ބައްދަލުވުމުގައި ވައިކަރަދޫ ދާއިރާގެ އެމްޑީޕީ މެމްބަރު ޙުސައިން ޒިޔާދު ވިދާޅުވީ، ވަޒީރުން މަޖިލީހަށް އައްޔަންކުރެއްވި ބައެއް ބޭފުޅުންނަކީ ގިނަ ދުވަސްތަކެއް ވަންދެން ރާއްޖެއިން ބޭރުގައި ދިރިއުޅުއްވި ބޭފުޅުންކަމަށެވެ. އެހެންކަމުން، އެ ބޭފުޅުންގެ އަތުގައި އެހެން ޤައުމެއްގެ ޕާސްޕޯޓެއް އޮވެދާނެތީ އެކަން ބެލުމަށް އިމިގްރޭޝަނުގައި އެދިވަޑައިގެންނެވިކަމަށެވެ. އެއީ އެ އިދާރާގެ އިހްތިސާސްގައި ހިމެނޭކަމެއް ނޫންކަން އިމިގްރޭޝަނުން މަޖިލީހަށް އަންގަވާފައިވާކަމަށް ޒިޔާދު ވިދާޅުވިއެވެ.

Advertisement

ވަޒީރުން މަޖިލީހަށް ކޮމެޓީއަށް ހާޒިރުކުރަންވެސް މެމްބަރަކު ހުށައެޅުއްވިއެވެ. އެހެންނަމަވެސް ރުހުން ދިނުމުގެ މަރުހަލާގައި އެއްވެސް ވަޒީރަކާއި އިންޓަރވިއު ނުކުރެވޭނެކަމަށް ސުޕްރީމްކޯޓުން ނިންމަވާފައިވާތީ ކޮމެޓީން ނިންމެވީ ރައީސް އޮފީހުން މައުލޫމާތު ސާފުކުރެއްވުމަށެވެ. އެގޮތުން ވަޒީރުކަމަށް އައްޔަންކުރެއްވި ބޭފުޅުންގެ ރަށްވެހިކަމާއި ގުޅޭ މައުލޫމާތު ހޯދުމަށް ރައީސް އޮފީހުގައި އެދިވަޑައިގަތުމަށް ކޮމެޓީން ވަނީ ފާސްކުރައްވާފައެވެ.

ގާނޫނުއަސާސީ ބުނާ ގޮތުން، ވަޒީރުންގެ މަޖިލީހަށް އައްޔަން ކުރާ ވަޒީރުންނަކީ، އެހެން ގައުމެއްގެ ރައްޔިތަކަށް ވެގެން ނުވާނެއެވެ.

މި ސަރުކާރުގެ ކެބިނެޓުގައި އެހެން ގައުމެއްގެ ރަށްވެހިކަން އޮންނަ ކަމަށް ބެލެވެނީ އިނގިރޭސިވިލާތުގައި ދިރިއުޅުއްވަމުން ގެންދެވި ހައުސިން މިނިސްޓަރު ޑރ. އަލީ ހައިދަރު އަދި ނިއު ޒީލެންޑުގައި އުޅުއްވި ހަޔަ އެޑިއުކޭޝަން މިނިސްޓަރު ޑރ. މަރިޔަމް މާރިޔާގެއެވެ.