ރައީސް ޔާމީނުގެ ހިޔަނީގައި ވެރިކަމަށް ވަޑައިގެންނެވި، ޑރ. މުޙައްމަދު މުޢިއްޒާއި ދެކޮޅަށް ރައީސް ޔާމީނު ނުކުންނަވާފައިވާތީ، ސަރުކާރުން އެމަނިކުފާނު އަނބުރާ ޖަލަށް  ގެންދަން އުޅޭ ކަމުގެ އަޑުތައް ގަދަވެއްޖެއެވެ.

ރައީސް ޔާމީނު ޖަލު ބަންދުން ގޭބަންދަށް ބަދަލުކޮށްދިނީ ކުރީގެ ރައީސް އިބްރާހީމް މުޙައްމަދު ޞާލިޙްގެ ވެެރިކަމުގައި އޮކްޓޫބަރު މަހުގެ 1 ވަނަ ދުވަހުގައެވެ.

ޑރ. މުހައްމަދު މުޢިއްޒުގެ ވެރިކަމުގެ ފުރަތަމަ ދުވަހު ރައީސް ޔާމީނު މިނިވަންކޮށްދެއްވާނެކަމަށް، ޑރ. މުޙައްމަދު މުޢިއްޒު ސަޕޯޓަރުންނަށް ވަޢުދުވެވަޑައިގެންނެވި ނަމަވެސް ވެރިކަމުގެ ދެވަނަ ހަފްތާ ފެށުނު އިރުވެސް ރައީސް ޔާމީނު މިނިވަންކުރެއްވުމަށް، ޑރ. މުޙައްމަދު މުޢިއްޒުގެ ސަރުކާރު އެކަށީގެންވާ މަސައްކަތްތަކެއް ކޮށްފައެއް ނުވެއެވެ. އޭގެ އިތުރަށް ވެރިކަން ލިބިވަޑައިގެންނެވުމާއި، އެކު ޑރ. މުޢިއްޒު ވަނީ ރައީސް ޔާމީން އެކަހެރިކޮށްލައްވާފައެވެ.

މިދިޔަ ބުރާސްފަތި ދުވަހު ރައީސް ޔާމީނު ވަނީ ޕީޕީއެމްއިން ވަކިވެވަޑައިގެން އައު ސިޔާސީ ޕާޓީއެއް އުފެއްދުމުގެ މަސައްކަތް ފައްޓަވާފައެވެ. މިގޮތުން ޕީޕަލްސް ނެޝަނަލް ފްރޮންޓްގެ ނަމުގައި އެމަނިކުފާނު އުފައްދަވާ ޕާޓީގެ އޮފީސް، ޕީޕީއެމްގެ އޮފިސް ކުރިން ހިންގި ހ. ހުރަފައިގައި ޤާއިމްކޮށް އެއޮފީހަށް ރައީސް ޔާމީން ރޭ ވަނީ ވަޑައިގެންފައެެވެ.

ރައީސް ޔާމީނު، ކަރެކްޝަންސްއިން އެމަނިކުފާނަށް ދީފައިވާ ލުއިތަކާއި ޚިލާފަށް ޕާޓީ ހަރަކާތްތަކުގައި ބައިވެރިވެވަޑައިގެން ސަރުކާރަށް ޕްރެޝަރުތައް ކުރިމަތި ކުރައްވާތީ، ރައީސް ޔާމީނު އަނބުރާ ޖަލަށް ގެންދެވުމަށް ރައިސް ޑރ. މުޙައްމަދު މުޢިއްޒު ހޯމް މިނިސްޓަރ އަލީ އިޙްސާނަށް އަންގަވާފައިވާ ކަަމަށް ބުނެ ސޯޝަލް މީޑިއާގައި ދަނީ ވާހަކަތައް ފަތުރަމުންނެވެ. އަދި މިވާހަކަތަކާއި ގުޅޭ ގޮތުން މިހާތަނަށް ސަރުކާރުން އެއްވެސް ރައްދެއް ދީފައެއް ނުވެއެވެ.

ރައީސް ޔާމީނު އައު ޕާޓީއެއް އުފެއްދެވުމަކީ، ޑރ. މުއިއްޒުގެ ސަރުކާރަށް ވަރަށްބޮޑު ގޮންޖެހުމަކަށް ވާނެތީ، ރައީސް ޔާމީނު ހުއްޓުވެން އޮތް ގޮތަކަށް ހުއްޓުވުމަށް ސަރުކާރުން ވަނީ މަސައްކަތް ފަށާފައި ކަމަށް ޚަބަރުތައް ބުނެއެވެ.