މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ޚިދުމަތާ އަލަށް ގުޅުނު އޮފިސަރުންގެ އަސާސީ ތަމްރީން ފުރިހަމަކޮށް 37 އޮފިސަރަކު މަޤާމުގެ ހުވާކޮށްފިއެވެ.

މިކަމަށްޓަައި ބޭއްވި ޚާއްޞަ ރަސްމިއްޔާތު އޮތީ ރޭ މާފުށީ ޖަލުގައެވެ.

މޯލްޑިވުސް ކަރެކްޝަނަލް ސަރވިސްއިން ހާމަކުރައްވާފައިވާ ގޮތުގައި، “ސެޓްފިކެޓް 3 އިން ކަސްޓޯޑިއަލް މެނޭޖްމަންޓް އެންޑް ސެކިއުރިޓީ” ޕްރޮގްރާމް ގެ 10 ވަނަ ބެޗްގައި، ޖުމުލަ 38 ފަރާތަކުން ބައިވެރިވިއިރު އޭގެތެރެއިން 37 ފަރާތަކުން ވަނީ ތަމްރީނު ފުރިހަމަކޮށް ދަސްވެނިވެ މަޤާމުގެ ހުވާކޮށްފައެވެ. ދަސްވެނިވި އޮފިސަރުންނަށް މަޤާމުގެ ހުވައި ލައިދެއްވީ، ސިވިލްކޯޓުގެ ގާޟީ ފައިސަލް އާދަމްއެވެ. 

މިރަސްމިއްޔާތުގައި ވަނީ، އެންމެ ދުޅަ ހެޔޮ ފިރިހެން އޮފިސަރާއި، ތަޢުލީމީ ރޮގުން އެންމެ މޮޅު އޮފިސަރާއި، އަމަލީ ގޮތުން އެންމެ މޮޅު އޮފިސަރުގެ އިތުރުން “ކޮމިޝަނަރ އޮފް ޕްރިޒަންސް އެވޯޑް” ހޮވާ، ސެޓްފިކެޓް އަދި ސެޓްފިކެޓް އަދި ޝީލްޑް ޙަވާލުކޮށްފައެވެ. ކޯހުން ހުރިހާ ގޮތަކުން އެންމެ މޮޅު އޮފިސަރަކަށް ހޮވުނީ، ޕްރައިވެޓް މުޙައްމަދު ހިޝާމް އިސްމާޢީލްއެވެ.

މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ، 28 ވަނަ އަސާސީ ތަމްރީންކޯސް، "ސެޓްފިކެޓް 3 އިން ކަސްޓޯޑިއަލް މެނޭޖްމަންޓް އެންޑް ސެކިއުރިޓީ" ކޯސް ކުރިޔަށް ގެންގޮސްފައި ވަނީ، 22 ޖުލައި 2023 އިން ފެށިގެން 3 މަސް ދުވަހުގެ މުއްދަތަކަށެވެ.