އައު ސިޔާސީ ޕާޓީއެއް އުފައްދަވައި، ރައީސް ޔާމީން މިފައްޓަވާ ސިޔާސީ ދަތުރު ވެގެންދާނީ ރާއްޖެ ބަދަލުކޮށްލާނެ ދަތުރަކަށްކަމުގައި، ރައީސް ޔާމީނުގެ ފުރަތަަމަ ނައިބު ރައީސް އަދި އެމަނިކުފާނުގެ ޤާނޫނީ ވަކީލް ޑރ.މުހައްމަދު ޖަމީލް އަޙްމަދު ވިދާޅުވެއްޖެއެވެ.

ޑރ ޖަމީލް މިހެން ވިދާޅުވީ، ރައީސް ޔާމީނު އުފެއްދެވުމަށް މަސައްކަތްކުރައްވަމުން ގެންދަވާ އައު ސިޔާސީ ޕާޓީ އުފެއްދުމާއި ގުޅޭ ގޮތުން މިއަދު އިލެކްޝަންސް މިޝަނާއި ބައްދަލު ކުރެއްވުމަށް ފަހުގައި، ރާއްޖޭގެ މީޑިއަތަކާއި ބައްދަލު ކުރައްވައި ވާހަކަފުޅު ދައްކަވަމުންނެވެ.

ޑރ ޖަމީލް ވިދާޅުވީ، ރައީސް ޔާމީނުގެ އަސްލު ހަޤީޤީ ވަފާތެރިންނާއި، އަސްލު ހަޤީޤީ އެކުވެރިންނާއި އެކީގައި މިފަށާ ސިޔާސީ ދަތުރުވެގެންދާނީ، ދިވެހިރާއްޖެ ބަދަލުކޮށްލާނެ ސިޔާސީ ދަތުރަކަށް ކަމަށެވެ. 

މީގެ އިތުރުން ޑރ. ޖަމީލް ވަނީ، އިންތިޚާބު ކާމިޔާބު ކުރެވުމަށްފަހުގައި، ރައީސް ޔާމީނާއި މެދު ޕީޕީއެމް ޕީއެންސީގެ އިސްބޭފުޅުން ޢަަމަލުކުރި ގޮތުގެ ވާހަކަވެސް ވިދާޅުވެފައެވެ. ޑރ. ޖަމީލް ވިދާޅުވީ، އެބޭފުޅުން ރައީސް ޔާމީނުގެ އަރިހަށް ވަޑައި ނުގަންނަވާ ކަމަށާއި، އަދި ޝުކުރުގެ ބަހެއްވެސް ބުނެ ނުލާ ކަމަށެވެ. އަދި މިއަދު އެބޭފުޅުން އެތިއްބެވި ގޮތް ދިވެހިރައްޔިތުންނަށް އެވަނީ ފެނިފައި ކަމުގައިވެސް ޑރ. ޖަމީލް ވިދާޅުވިއެވެ.

ޑރ. މުޙައްމަދު މުޢިއްޒު ރިޔާސީ އިންތިޚާބު ކާމިޔާބު ކުރެއްވީ، ރައީސް ޔާމީނުގެ ހިޔަނީގައި ކަމީ ހުރިހާ ފަރާތްތަކުންވެސް ޤަބޫލުކުރާ ޙަޤީޤަތެކެވެ. އެހެން ނަމަވެސް އިންތިޚާބު ކާމިޔާބު ވުމާއިއެކު، ޑރ. މުޙައްމަދު މުޢިއްޒުގެ ރާގާއި ބަސްަމަގު ވަނީ ބަދަލުވެފައެވެ.