ކުރީގެ ރައީސް ޢަބުދުޓ ޔާމީން ޢަބުދުލްޤައްޔޫމް އައު ސިޔާސީ ޕާޓީއެއް އުފެއްދެވުމުގެ މަސައްކަތްޕުޅު ފެއްޓެވީ، އެމަނިކުފާނު އެންމެ ލޯބިފުޅުވާ ޕާޓީ ބަޔަކު ފޭރިގެންފައިވާތީ ކަމުގައި، އައު ޕާޓީ އުފެއްދުމުގެ މަސައްކަތުގައި އިސްކޮށް ހަރަކާތްތެރިވެވަޑައިގަންނަވާ މުޙައްމަދު މަލީހް ޖަމާލް ވިދާޅުވެއްޖެއެވެ.

މަލީހް މިހެން ވިދާޅުވީ، ރައީސް ޔާމީން އުފައްދަވާ އައު ޕާޓީ، ޕީޕަްސް ނެޝަނަލް ފްރޮންޓް އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ހުށައެޅުއްވުމަށްފަހުގައި، ރާއްޖޭގެ މީޑިއާތަކާއި ބައްދަލުކުރައްވައި ދެއްކެވި ވާހަކަފުޅުގައެވެ.

މަލީހް ވިދާޅުވީ، ރައީސް ޔާމީނުގެ އަތްޕުޅުން ޕާޓީ ފޭރިގެންފައިވާތީ އެކަން ވަރަށް ހަރުކަށި ޢިބާރާތުން ކުއްވެރިކުރައްވާ ކަމަށެވެ. އަދި ރައީސް ޔާމީނުގެ އަތުން އެމަނިކުފާނުގެ ޕާޓީ ވަނީ ބަޔަކު ވަގަށް ނަގާފައި ކަމުގައިވެސް މަލީޙް ވިދާޅުވިއެވެ. އަދި އެކަމުގެ އެންމެ އަޑީގައި ހުރީ ޢަބުދުއްރަހީމް ކަމަށާއި، ވަރަށް ހިތާމަޔާއިއެކު އެކަން ފާހަގަކުރައްވާކަމުގައިވެސް މަލީޙް ވިދާޅުވިއެވެ.

މަލީހް ވިދާޅުވީ، މިވަގުތަކީ، ރައީސް ޔާމީނަށް ތާއީދު ކުުރައްވާ ފަރާތްތަކުން އެމަނިކުފާނު އަލަށް އުފައްދަވާ ޕާޓީ، ޕީޕަލްސް ނެޝަނަލްސް ފްރޮންޓްއާ ގުޅިވަޑައިގަންނަވަންވީ ވަގުތު ކަމަށެވެ. އަދި ޕީޕިއެމް ޕީއެންސީގައި ތިބި ރައީސް ޔާމީންގެ ސަޕޯޓަރުންގެ ފަރާތްޕުޅުން އެމަނިކުފާނު އެކަމަށް އެދިވަދައިގަންނަވާ ކަމުގައިވެސް މަލީހް ވިދާޅުވިއެވެ.

ރައީސް ޔާމީނު އަލަށް އުފައްދަވާ، ޕާޓީގެ މުއައްސިސަކީ، ރައީސް ޔާމީނުގެ ދަރިކަލުން، ޒެއިން ޢަބުދުﷲ ޔާމީން ޢަބުދުލްޤައްޔޫމެެވެ. މަލީޙް ވިދާޅުވި ގޮތުގައި ޒެއިންއަށް ހުއްދަދޫކުރެއްވުމަށް އިލެކްޝަންސް ކޮމިޝަންގައި އެދެން ޖެހުނީ، އިލެކްޝަންސް ކޮމިޝަންގެ ޤަވާއިދު އޮންނަ ގޮތުން ޕާޓީ އުފެއްދުމުގެ ހުއްދައަށް އެދި ހުށައެޅެނީ އެންމެ ބޭފުޅެއްގެ ނަމުގައި ކަމަށް ވާތީއެވެ. އެހެން ނަމަވެސް ކުރިޔަށް އޮތްތަނުގައި ޕާޓީގެ މުއައްސިސުންގެ ގޮތުގައި 8 ބޭފުޅަކު ފެނިގެންދާނެ ކަމުގައި މަލީޙް ވިދާޅުވިއެވެ.