ޑިސެމްބަރ 1 ވަނަ ދުވަހު ސިނަމާތަކަށް އަންނަ 'އެނިމަލް' ފިލްމުގެ ޓްރެއިލަރ އާއެކު ގިނަބަޔަކު ދަނީ މި ފިލްމުގެ މޮޅު ވާހަކަ މިހާރުވެސް ދައްކަމުންނެވެ. ރަންބީރު ކަޕޫރު މުޅިން ތަފާތު ރޯލަކުން ފެނިގެން ދާއިރު ދެން މި ފިލްމުގައި ފެނިގެންދާނީ އަނިލް ކަޕޫރާއި ބޮބީ ޑިއޯލްއެވެ. އަދި އަންހެން ތަރިއެއްގެ ގޮތުގައި ޓަމިލް ފިލްމުތަކުން މަޝްހޫރުކަން ހޯދާފައިވާ ރަޝްމިކާ ފެނިގެންދާނެއެވެ.

ފިލްމުގެ ޓްރެއިލަރ އިން ބައްޕައާއި ދަރިއެއްގެ ވަރުގަދަ ގުޅުން ފެނިގެންދަނީ މުޅިން ތަފާތު ގޮތަކަށެވެ. އަނިޔާވެރިކަމާއި ލޭއޮހޮރުވުން އިންތިހާއަށް ބޮޑު މި ފިލްމުގެ ދިގުމިނަކީ ވެސް މިހާރު އަޅުވާ ފިލްމުތަކަށް ބަލާފައި މީހުން ހައިރާންވި ކަމެކެވެ. އެގޮތުން ފިމްލުގެ ދިގުމިން 3 ގަޑިއިރާއި 21 މިނެޓަށް އަރައެވެ. ނަމަވެސް، މި ފިލްމުގެ ޓްރެއިލަރ އަށްފަހު އެންމެންވެސް ތިބީ މި ފިލްމު ސްކްރީނުން ބަލާލުމަށް ކެތްމަދު ވެފައެވެ. އަދި ފިލްމުގެ އެޑްވާންސް ބުކިންގތައް ވެސް މިހާރު ވަނީ ވަރަށް މައްޗަށް ގޮއްސައެވެ.

'އެނިމަލް' ގެ ޑައިރެކްޓަރަކީ ސަންދީޕް ރެޑީ ވެންގާއެވެ. 'އަރުޖުން ރެޑީ' އަދި އޭގެ ހިންދީ ރިމޭކް 'ކަބީރް ސިންގް' ޑައިރެކްޓް ކޮށްފައިވާ ސަންދީޕްގެ މިފަހަރުގެ ފިލްމަށް ގިނަބައެއްގެ އުއްމީދު ވަރަށް ބޮޑެވެ. 'އެނިމަލް' ވަނީ މާލޭގެ ޝްވެކް ސިނަމާގައި އެޅުވުމަށް ވެސް ހަމަޖެހިފައެވެ. އެހެންކަމުން މި ފެށޭ ޑިސެމްބަރ މަސް އަހަރެމެނާ ބައްދަލު ކުރާނީ 'އެނިމަލް' އާއެކުގައެވެ.