ފަލަސްތީނަށް އެހީވުމަށްޓަކައި ރާއްޖޭގެ އެކިކަންކޮޅުގައި އެކި ހަރަކާތްތައް ކުރިއަށް ދާއިރު މި ހަރަކާތްތަކުގައި އެކިއެކި ކުންފުނިތަކާއި ގުރޫޕުތަކުން ދަނީ ގުޅެމުންނެވެ. އެގޮތުން ދިވެހި ފިލްމީ ފަންނާނުން މިދިއަ އޮކްޓޫބަރު މަހުގެ 27 ވަނަ ދުވަހު ފެށި ހަރަކާތްތައް މިމަހުގެ 03 ވަނަ ދުވަހުގައި ނިންމާލިއިރު ޖުމްލަ 685،651.90 ރުފިޔާ ވަނީ ހޯދާފައެވެ.

'އިންސާނިއްޔަތަށްޓަކައި' ނަމުގައި ބޭއްވި މި ހަރަކާތްތަކުގެ ތެރޭގައި ކުޑަކުދިންގެ ހަވީރު، ޖަމްބަލް ސޭލް، މަސް ދަތުރުތައް އަދި ފިލްމު ފެސްޓިވަލް ވެސް ހިމެނެއެވެ. މިކަމުގައި ގިނަ އަދަދެއްގެ ފަންނާނުން ވަނީ ބައިވެރިވެފައެވެ.

ފަންނާނުން އެއްކުރި ފައިސާ އޮލިމްޕަހުގައި މި މަހުގެ 23 ވަނަ ދުވަހު ބޭއްވި ހަފްލާއަކަށް ފަހު ވަނީ އިންޓަނޭޝަނަލް އެއިޑް ކެމްޕެއިން (އައިއޭސީ) އާއި ހަވާލުކޮށްފައެވެ.