ވެރިކަން ކުރާ ޕާޓީ، ޕީއެންސީއަށް އިތުރު 1،000 މީހުން ގުޅިފައިވާ ކަމަށް އެ ޕާޓީން ބުނެފިއެވެ.

އެކްސްގައި ޕީއެންސީން ކޮށްފައިވާ ޕޯސްޓެއްގައި ބުނެފައިވަނީ ޕީއެންސީއާ އިތުރު 1000 މީހުން ގުޅިފައިވާ ކަމަށެވެ. ނަމަވެސް މި ފޯމުތަކާއި ގުޅޭ އިތުރު ތަފްސީލެއް ދީފައިނުވެއެވެ.

އަލަށް ޕާޓީ ސޮއިކުރި މީހުންގެ ފޯމުތަކާ ހަވާލުވެވަޑައިގެންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހާއްސަ އެޑްވައިޒަރު، އަބްދުއްރަހީމް އަބްދުﷲ (އަދުރޭ) އެވެ.

މިދިޔަ ފެބްރުއަރީ 21 އާ ހަމައަށް ޕީއެންސީގައި މެންބަރުންގެ ގޮތުގައި ތިބީ 3159 މެންބަރުންނެވެ.

ރައީސް ޑރ. މުޙައްމަދު މުޢިއްޒުގެ އަމާޒަކީ ތިން މަސް ތެރޭގައި ޕީއެންސީ އަށް 10،000 މެމްބަރުން އިތުރުކޮށް، އެ ޕާޓީ ވަރުގަދަ ކުރުމެވެ. އެ ކަމަށްޓަކައި އެ މަނިކުފާނު ގެންދަވަނީ މަސައްކަތްތަކެއް ކުރައްވަމުންނެވެ.

ރައީސް ޑރ. މުޢިއްޒު ބޭނުންފުޅުވަނީ ކުރިއަަށް އޮތް ރައްޔިތުންގެ މަޖިލިހުގެ އިންތިހާބުގައި ވެސް ޕީޕީއެމް/ޕީއެންސީ ގުޅިގެން ވާދަކޮށް، މަޖިލިހުގެ ބޮޑު އަޣުލަބިއްޔަތެއް ހޯދުމަށެވެ.

ޕީޕީއެމް/ ޕީއެންސީގެ ކޯޅުންގަނޑު ބޮޑުވެ ރައީސް ޔާމީން މިހާރު ވަނީ ޕީޕީއެމްއިން ވަކިވެ އައު ސިޔާސީ ޕާޓީއެއް އުފެއްދުމަށް ހުށައަޅާފައެވެ. ޕީޕަލްސް ނޭޝަނަލް ފްރޮންޓްގެ ނަން ދީފައިވާ އެ ޕާޓީވެސް މަޖިލިސް އިންތިހާބުގެ ހުރިހައި ގޮނޑިއަކަށް ވާދަކުރާނެކަމަށް ވަނީ ބުނެފައެވެ. މި ޕާޓީ އުފެއްދުމަށް ހުށައަޅާފައިވަނީ ޔާމީންގެ ދަރިކަލުން ޒޭންގެ ނަމުގައެވެ.