އިންގްލިޝް ޕްރިމިއަރ ލީގުގެ އެއްވަނައަށް އެރުމަށް ޓީމުތަކުން ކޯޅުން ބޮޑުވެފައި ވަނިކޮށް، މެންޗެސްޓަރ ސިޓީއާއި ލިވަޕޫލް ބައްދަލު ކުރި މެޗު އެއްވަރުވުމުގެ ފައިދާ ނަގައި، އާސެނަލް ލީގުގެ އެއްވަނައަށް ޖެހިލައިފިއެވެ. ބްރެންޓްފޯޑާ ރަށުން ބޭރުގައި ބައްދަލުކުރި މި މެޗު އާސެނަލް ކާމިޔާބުކުރީ 1-0 އިންނެވެ.

މި މެޗަށް ނިކުތްއިރު ބްރެންޓްފޯޑަށް އެންމެ ބޮޑު ގޮންޖެހުމަކަށްވީ، އިންޓަނޭޝަނަލް ބްރޭކްގައި އެ ޓީމުގެ މުހިންމު ކުޅުންތެރިންތަކަކަށް އަނިޔާވެފައިވުމެވެ. އެގޮތުން މަތިއަސް ޖެންސެން، މެޑްސް ރޮއާސްލެވް އަދި ނަތަން ކޮލިންސްއަށް މި މެޗު ނުކުޅެވުނެވެ. 

އޭގެ ބަދަލުގައި، ކުޅުމާ ދުރުގައި ތިބި އާސެނަލްގެ ބައެއް މުހިންމު ކުޅުންތެރިންވަނީ އަނިޔާ ރަނގަޅުވެ ކުޅެންފަށާފައެވެ. އޭގެ ތެރޭގައި އެމީހުންގެ މުހިންމު މިޑްފިލްޑަރ މާޓިން އޮޑެގާޑް އަދި ސްޓްރައިކަރ ގެބްރިއަލް ޖީސުސް ހިމެނެއެވެ. އަދި ގިނަ ދުވަސްތަކަކަށްފަހު އާރޮން ރަމްސްޑޭލްވަނީ އާސެނަލްގެ ގޯލު ބަލަހައްޓަން ނިކުމެފައެވެ. އެއީ، ބްރެންޓްފޯޑާ ދެކޮޅަށް ޑޭވިޑް ރާޔާއަށް ނުކުޅެވޭނެތީއެވެ. ބްރެންޓްފޯޑްއިން އާސެނަލްއަށް ރަޔާ ދޫކުރިއިރު، އެ ޓީމާ ދެކޮޅަށް ރާޔާއަށް ނުކުޅެވޭނެކަމަށްބުނާ މާއްދާއެއް އެއްބަސްވުމުގައި ހިމަނާފައިވެއެވެ.

އާސެނަލްއަށް ގޯލު ކާމިޔާބުކޮށްދިން ކައި ހަވަޓްސް ކުޅެން ނިކުތީ ގެބްރިއަލް މާޓިނެލީގެ ބަދަލުގައި މެޗުގެ 79 ވަނަ މިނެޓުގައެވެ. އަދި އޭގެ 10 މިނެޓުފަހުން، މެޗުގެ 89 ވަނަ މިނެޓުގައި އާސެނަލް މޮޅުކޮށްދިން ގޯލު އޭނާ ކާމިޔާބުކޮށްދިނެވެ.

މި ނަތީޖާއާއެކީ، 13 މެޗުން ލިބުނު 30 ޕޮއިންޓާއެކީ އާސެނަލް އެއްވަނައިގައި އޮތްއިރު، ދެވަނައިގައި އޮތް ސިޓީއަށް ލިބިފައިވަނީ 29 ޕޮއިންޓެވެ. އަދި ތިން ވަނައިގައި އޮތް ލިވަޕޫލަށް 28 ޕޮއިންޓު ލިބިފައިވީނަމަވެސް، މިރޭ އެސްޓަންވިލާއާ ދެކޮޅަށް ކުޅޭ މެޗު ޓޮޓެންހަމްއިން ކާމިޔާބުކޮށްފިނަމަ، އެ ޓީމު ތިން ވަނައަށް އަރާނެއެވެ. އަދި އެސްޓަންވިލާ މޮޅުވެއްޖެނަމަ، އެސްޓަންވިލާ އާއި ލިވަޕޫލް ޕޮއިންޓުގެ ގޮތުން ހަމަހަމަ ވާނެއެވެ.