ރާއްޖޭގައި ތިބި އިންޑިއާގެ ސިފައިން ބާލަން އެންގުމަކީ ރާއްޖެއަށް އެންމެ ރަނގަޅު ގޮތް ކަމަށް ފެނިވަޑައިނުގަންނަވާކަމަށް, ރައްޔިތުންގެ މަޖިލީހުގެ ކުރީގެ ރައީސް, ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ, ސައުތު އެފްރިކާގެ ކޭޕް ޓައުންގައި ކުރިޔަށްދޔަ ސެމިނާއެއްގެ ހަވާސާގައި އިންޑިއާގެ ނޫހަކުން ކުރި ސުވާލަކަށް ޖަވަބު ދެއްވަމުންނެވެ.

އައު ސަރުކާރު އައުމުން ރާއްޖެއާއި އިންޑިއާއާ ދެމެދު އޮތް ގުޅުމަށް ކުރާނެ އަސަރަކީ ކޮބައިތޯ ސުވާލު ކުރުމުން ރައީސް ނަޝީދު ވިދާޅުވީ, އަލަށް އުފެދުނު ސަރުކާރުން ގެންގުޅޭނީ ތަފާތު ޚާރިޖީ ސިޔާތެއް ކަމަށާއި, ނަމަވެސް އެކަމުން އިންޑިއާ އޮތް ގުޅުން ހީނަރުވެގެންދާނެ ކަމަށް ޤަބޫލުފުޅު ނުކުރައްވާ ކަމަށް ވިދާޅުވިއެވެ.

އިންޑިއާ ސިފައިން ބޭލުމަށް ސަރުކާރުން ކުރަމުންދާ މަސައްކަތްތަކާ ގުޅޭ ގޮތުން ރައީސް ނަޝީދު ވިދާޅުވީ, އެއީ ރާއްޖެއަށް އޮތް އެންމެ ރަނގަޅު ގޮތް ނޫން ކަމަށެވެ. އަދި ރާއްޖޭގެ މުސްތަޤްބަލު އޮތީ އިންޑިއާ ފަދަ ބާރަކާއެކު މަސައްކަތްކޮށްގެން ކަަމަށް ވެސް ވިދާޅުވިއެވެ.

ރައީސް ނަޝީދު ވިދާޅުވީ, މިއަދުގެ އައު ސަރުކާރުން އިންޑިއާއެކު ގާތް ގުޅުމެއް ބާއްވާނެ ކަމަށް ޤަބޫލުފުޅު ކުރައްވާ ކަމަށެވެ. އަދި އިންޑިއާއިން ވެސް ސަރުކާރާއެކު ގުޅުން ބަދަހިކުރުމަށް ރައީސް ނަޝީދު ވަނީ އެ ޤައުމަށް ގޮވާލައްވާފައެވެ.

ރައީސް ޑރ. މުޢިއްޒުުގެ ސަރުކާރުން ވަނީ, ސަރުކާރުގެ ފުރަތަމަ ދުވަހު ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އިންޑިއާގެ ސަރުކާރުގައި ރަސްމީކޮށް އެދިފައެވެ. ރާއްޖޭގައި އިންޑިއާއިން އޮޕްރޭޓް ކުރާ ދެ ކޮލިކޮޕްޓަރާއި ޑޯނިއާ ދުއްވުމަށް 77 ސިފައިން ޤާއިމްވެ އެބަތިއްބެވެ.