ކުރީގެ ޓްރާންސްޕޯޓް މިނިސްޓަރ އަދި ޖުމްހޫރީޕާޓީގެ ލީޑަރު ޤާސިމް އިބްރާހީމްގެ އަނބިކަނބަލުން ޢައިޝަތު ނަހުލާ، ޖުމްހޫރީ ޕާޓީގެ އިސްބޭފުޅުންގެ ޓީމެއް ގޮވައިގެން ރައީސް ޑރ. މުހައްމަދު މުޢިއްޒުގެ އަރިހަށް ޒިޔާރަތްކުރައްވައި އެމަނިކުފާނާއި ބައްދަލުކުރައްވައިފިއެވެ.

އެނގިފައިވާގޮތުގައި މިބައްދަލު ކުރެއްވުން އޮތީ، ރައީސް ޑރ. މުޙައްމަދު މުޢިއްޒުގެ ގެކޮޅު މާފަންނު ދިމްޔާތުގައި ރޭގެ އިރާކޮޅުގައެވެ.

މިބައްދަލުކުރެއްވުމުގައި، ޖުމްހޫރީޕާޓީގެ އިސް ސަފުގައި ތިއްބެވި ބައެއް ބޭފުޅުންނާއި، ރައިސް، ޑރ. މުޙައްމަދު މުޢިއްޒުގެ އަރިސްބޭފުޅުންނާއި ޕީޕިއެމް ޕީއެންސީގެ ސެނެޓުގައި ހިމެނޭ މެމްބަރުން ބައިވެރިވެވަޑައިގެންނެވިއެވެ. 

މިބައްދަލުކުރެއްވުން ބޭއްވިކަން ޖުމްހޫރީޕާޓީން ހާމަކުރި ނަމަވެސް ބައްދަލުވުމާއި ގުޅޭ ގޮތުން އެޕާޓީންވެސް އިތުރު މައުލޫމާތެއް ހާމައެއް ނުކުރެއެވެ. އެހެން ނަމަވެސް އެނގިފައިވާ ގޮތުގައި ރޭގެ ބައްދަލުވުމަކީ، ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ޖުމްހޫރޕާޓީން ސަރުކާރާއި ގުޅިގެން ކުރިޔަށް ދިޔުމާއި ގުޅޭ ގޮތުން މަޝްވަރާކުރުމަށް ބޭއްވި ބައްދަލުވުމެކެވެ.

ރޭގެ ބައްދަލުވުމުގައި ޕީޕީއެމްއަށް 2018 ވަނަ އަހަރު ވެރިކަން ގެއްލުމުން އެޕާޓީ ދޫކޮށް ދިޔަ މެމްބަރުންގެ ތެރެއިން، ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެމްބަރު އަޙްމަދު ނިޙާން ހުސައިން މަނިކާއި، ރައްޔިތުންގެ މަޖިލީހުގެ ވިލުފުށި ދާއިރާގެ ކުރީގެ މެމްބަރު ރިޔާޒް ރަޝީދާއި، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު ޢަލީ ޙުސައިން ބައިވެރިވެވަޑައިގަތެވެ.

ޖުމްހޫރީ ޕާޓީގެ ލީޑަރު ޤާސިމް އިބްރާހީމަށް، ރިޔާސީ އިންތިޚާބުގައި ލިބުނު އާދަޔާޚިލާފު ބޮޑު ނާކާމިޔާބަށް ފަހުގައި، ޖުމްހޫރީޕާޓީގެ ހަރަކާތްތައް އޮތީ މުޅިންހެން ހުއްޓިފައެވެ. އަދި އެޕާޓީ އުވާލައި، ޕީޕީއެމްއާ ޕީއެންސީއަށް ޕާޓީގެ މެމްބަރުން ގުޅެން އުޅޭ ކަމަށް ދެކެވޭ ވާހަކަތައް، ޖުމްހޫރީ ޕާޓީން ވަނީ ދޮގުކޮށްފައެވެ. އެހެން ނަމަވެސް ޤާސިމް އިބްރާހީމަށް ލިބުނު ސިޔާސީ ބޮޑު ނާކާމިޔާބީއަށް ފަހުގައި، ޖުމްހޫރީޕާޓީގެ ކުރިމަގު އޮތީ ސުވާލުތަކެއްގެ ތެރޭގައެވެ.