Advertisement
މިރޭ ބޭއްވި ޕީޕީއެމްގެ ސެނެޓް ބައްދަލުވުމުގެ ތެރެއިން ---
މަޖިލިސް އިންތިޚާބަށް ޕީޕީއެމާއި ޕީއެންސީން އެކުގައި ނިކުންނަށް ނިންމައިފި
ޕީޕީއެމް ޕީއެންސީ ގުޅިގެން ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް ނިންމައިފި ކަމުގައި އެދެޕާޓީން ބުނެފިއެވެ.
ޕީޕިއެމްއިން މިކަން ހާމަކުރީ، މިރޭ ބޭއްވި އެޕާޓީގެ ސެނެޓުގެ ބައްދަލުވުމަށް ފަހުގައެވެ. ޕީޕީއެމްއިން ބުނީ އެނިންމުން ނިންމާފައި ވަނީ، ޕީޕީއެމްގެ ސެނެޓުގެ އިއްތިފާޤުން ކަމަށެވެ. އަދި މަޖިލިސް އިންތިޚާބާއި ގުޅޭ ދެންހުރި ކަންކަން ނިންމާނީ ދެޕާޓީގެ ޖޮއިންޓް ސެނެޓުން ކަމުގައި ހަމަޖައްސާފައިވާ ކަމުގައިވެސް ޕީޕީއެމުން ވަނީ ބުނެފައެވެ.
މިރޭ ބޭއްވި ޕީޕީއެމްގެ ސެނެޓުގެ ބައްދަލުވުމުގެ ރިޔާސަތު ބަލަހައްޓަވާފައި ވަނީ އެޕާޓީގެ ދެ ނައިބު ލީޑަރުންކަމުގައިވާ، ފިޝަރީޒް މިނިސްޓަރ އަޙްމަދު ޝިޔާމާއި، ޑިފެންސް މިނިސްޓަރ ޣައްސާާނު މައުމޫނެވެ.
ޕީޕީއެމްގެ ރައީސްގެ މަޤާމުގައި ހުންނެވި ކުރީގެ ރައީސް ޔާމީނު ވަނީ ބުރާސްފަތި ދުވަހު ޕީޕީއެމްއިން ވަކިވެވަޑައިގެންފައެވެ. އަދި އެމަނިކުފާނުވެސް އައު ސިޔާސީ ޕާޓިއެއް އުފެއްދުމުގެ މަސައްކަތް ފައްޓަވާފައިވާއިރު، އައު ޕާޓީއެއް ރައީސް ޔާމީނު އުފެއްދެވުމުގެ ބޭނުންފުޅަކީ، ރައްޔިތުންގެ މަޖިލީހުގެ އިންތިޚާބު ކާމިޔާބު ކުރެއްވުންކަމުގައި ސިޔާސީ ދާއިރާގެ ތަޖުރިބާކާރުން ވިދާޅުވެއެވެ.
