އިންގްލިޝް ޕްރިމިއަލީގުގައި އާދިއްތަ ދުވަހުގެ ރޭ ރާއްޖެ ގަޑިން 9:30 ގައި މެންޗެސްޓަރ ޔުނައިޓެޑާއި އެވަޓަން ބައްދަލުކުރާ މެޗުގެ 10 ވަނަ މިނެޓުގައި، ދަނޑުގައި ކުޅި ބަލަން ތިބެގެން މުޒާކުރުމަށް އެވަޓަންގެ ސަޕޯޓަރުންގެ ގްރޫޕެއް ކަމުގައިވާ  “1878” އިން މަސައްކަތް ކުރަމުން އެބަދެއެވެ. މި ގްރޫޕުން ގޮވާލާފައިވަނީ، ލީގުގައި ކޮރަޕްޝަން އުފެދިފައިވާ އިބާރާތްތައް އެ ހަރަކާތުގައި ބޭނުން ކުރުމަށެވެ. 

ލީގުގެ ފައިސާއާ ގުޅޭ ގަވާއިދުތަކަކާ އެވަޓަންއިން ޚިލާފުވެފައިވާކަމަށް ކަނޑައަޅައި، އެ ޓީމަށް ލީގުގައި މިހާތަނަށް ލިބިފައިވާ 14 ޕޮއިންޓުން 10 ޕޮއިންޓު އުނިކުރި މައްސަލައިގައި ރުޅިގަދަވެފައި ތިބި ސަޕޯޓަރުންވަނީ މި ހަރަކާތަށް 50 ހާސް ޑޮލަރުގެ ފަންޑެއް އެއްކޮފައެވެ. މި ފަންޑު ބޭނުންކޮށްގެން ފިޔާތޮށި ކުލައިގެ ކާޑުތަކެއް ހަދާ، އެ ކާޑުތަކުގައި “ކޮރަޕްޝަން” ޖެހުމަށްފަހު ސަޕޯޓަރުންނަށް ބެހުމަށް ހަމަޖެހިފައިވާކަމަށް ވެސް ރިޕޯޓުތައް ބުނެއެވެ. 

އަދަބެއްގެ ގޮތުން އެވަޓަންގެ 10 ޕޮއިންޓު ކަނޑާލާފައިވާއިރު، މި މައްސަލައާ ގުޅިގެން އެވަޓަން އިން ވަނީ މައްސަލަ އަލުން ދިރާސާ ކުރުމަށް ހުށަހަޅާފައެވެ. 

މި އަދަބާ ގުޅިގެން އެވަޓަންގެ ޑައިރެކްޓަރ އޮފް ފުޓްބޯލް، ކެވިން ތެލްވެލް ބުނެފައިވަނީ، އެ ނިންމުން ސައްޙަ ނޫންކަމަށާއި، އެކަމުގެ ސަބަބުން އެވަޓަންއަށް ވަނީ އިތުރު ހަކަތަ ލިބިފައި ކަމަށެވެ. 

އެވަޓަންއަކީ މެދުނުކެނޑި އެންމެ ގިނަ ސީޒަންގައި ވާދަކޮށްފައިވާ ދިގު ތާރީހެއް އޮތް ކްލަބެކެވެ. ނަމަވެސް މި އަދަބާ އެކީ އެ ޓީމު މިހާރު އޮތީ 4 ޕޮއިންޓާއެކު ލީގުގެ 19 ގައެވެ. އެހެންކަމުން މި އަދަބަކީ އެ ޓީމު ރެލިގޭޓް ވެދާނެކަމުގެ ބިރު ވެސް އޮތް އަދަބެކެވެ.