އެކުގައި މަސައްކަތްކުރި މުވައްޒަފަަކަށް ޖިންސީ ގޯނާކުރިކަމުގެ ތުހުމަތުތައް ކުރެވުނު، މުޙައްމަދު ފަޙްމީ ޙަސަން، ފޮރިން މިނިސްޓްރީގެ ސްޓޭޓް މިނިސްޓަރުކަމަށް ޢައްޔަނު ކުރެއްވިތާ 4 ދުވަސްފަހުން އިއްޔެ އެމަޤާމުން ވަކިކުރައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މަތީ މަޤާމަކަށް ފަޙްމީ މި ނޮވެމްބަރު މަހުގެ 20 ވަނަ ދުވަހު އައްޔަނުކުރެއްވުމާއި ގުޅިގެން އޭނާއަށާއި ސަރުކާރަށް ފާޑުކިޔުންތައް ވަނީ އަމާޒުވެގެން ގޮސްފައެވެ. 

ފަޙްމީގެ މައްޗަށް ތަފާތު އެކި މައްސަލަތަކުގެ ތުހުމަތުތައް ކުރެވިފައިވާ އިރު، އޭނާގެ މައްޗަށް ކުރެވިފައިވާ އެންމެ ސީރިއަސް ތުހުމަތަކީ، އަންހެން މުވައްޒަފެއްގެ ގައިގައި ޖިންސީ ނިޔަތެއް އޮވެގެން އަތްލައި ޖިންސީ ގޯނާ ކުރިކަމުގެ ތުހުމަތެވެ. އެކަން ހިނގާފައި ވަނީ، ފަޙްމީ ސިވިލް ސަރވިސް ކޮމިޝަންގެ ރައީސްކަމުގެ މަޤާމުގައި ހުންނެވި އިރު، 2012 ވަނަ އަހަރުގައެވެ. އެ މައްސަަލަ ބަަލައި ރައްޔިތުންގެ މަޖިލީހުން، 2012 ވަނަ އަހަރުގެ ނޮވެމްބަރު މަހު އޭނާ މަޤާމުން ވަކިކުރިއެވެ.

ފަޙްމީގެ މައްޗަށް ސީރިއަސް ތުޙުމަތުތަކެއް ކުރެވިފައި ވަނިކޮށް ރައީސް ޔާމީނުގެ ސަރުކާރުގައި 2015ވަނަ އަހަރު އޭނާއަށް މެލޭޝިއާ ސަފީރުކަންވެސް ވަނީ ދެއްވާފައެވެ. އޭގެ ކުރިން އޭނާ ހުންނެވީ ރާއްޖެއިން މެލޭޝިއާއަށް ކަނޑައަޅާފައިވާ ސަފީރުގެ ނައިބުކަމުގެ މަގާމުގައެވެ.

ފަހުމީއަށް މެލޭޝިއާ ސަފީރުކަން ދިނުމާއި ގުޅިގެންވެސް އޭރު ރައީސް ޔާމީނުގެ ސަރުކާރަށް ފާޑުކިޔުންތައް އަމާޒުވި ނަމަވެސް އެކަމާއި ގުޅިގެން ރައީސް ޔާމީނުގެ ސަރުކާރުން އެއްވެސް ފިޔަވަޅެއް ނާޅައެވެ.