ކުރީގެ ރައީސް ޢަބުދުﷲ ޔާމީން ޢަބުދުލްޤައްޔޫމް އިސްވެ ހުންނަވައި އަލަށް އުފައްދާވާ ޕާޓީ އުފެއްދުމުގެ ހުއްދައަށް އެދި އާދީއްތަ ދުވަހު އިލެކްޝަންސްކޮމިޝަނަށް ހުށައެޅުމަށް ތައްޔާރުވަމުންދާކަމުގައި ރައީސް ޔާމީނުގެ ފަރާތް ޕުޅުން އެމަސައްކަތުގައި ހަރަކާތްތެރިވާ ބޭފުޅުން ވިދާޅުވެއްޖެއެެވެ.

އާޕާޓީ އުފެއްދުމުގައި އިސްކޮށް މަސައްކަތް ކުރައްވަމުން ގެންދަވާ އެއްބޭފުޅަކީ، ރައީސް ޔާމީންގެ ދައުރުގައި ޔޫތު މިނިސްޓަރުގެ މަޤާމާއި އަދި ނިމި ދިޔަ ސަރުކާރުގައި ކޮމިއުނިކޭޝަން މިނިސްޓަރުގެ މަޤާމު ފުރުއްވާފައިވާ މުޙައްމަދު މަލީހް ޖަމާލެވެ. 

މަލީޙް ވިދާޅުވީ، އައު ޕާޓީގެ އަސާސި ޤަވާއިދުގެ ޑްރާފްޓް ނިމިފައިވާ ކަމަށާއި ލޯގޯ އާއި ނަންވެސް ފާސްކޮށްފައިވާ ކަމަށެވެ. އެހެން ނަމަވެސް އައު ޕާޓީއަސް ކިޔާ ނަމެއް އޭނާ ހާމައެއް ނުކުރައްވައެވެ.

Advertisement

މީގެ އިތުރުން މަލީހް ވިދާޅުވީ، ޕީޕީއެމް، ޕީއެންސީގައި މިވަގުތު ތިއްބެވި ރައީސް ޔާމީނަށް ތާއީދުކުރައްވާ އެމަނިކުފާނު ދެކެ ނުހަނު ލޯބިވާ މެމްބަރުން އަލަށް އުފައްދާ ޕާޓީއަށް ގުޅިވަޑައިގަންނަވަން އެދި ލައްވަމުން ދާކަމީ އެމަނިކުފާނު ނުހަނު އުފާފުޅުވާކަމެއްކަމަށާއި ހުރިހާ ބޭފުޅުން ޤައުމީ މިމަސައްކަތުގައި ބައިވެރިވުމަށް އެދިވަޑައިގަންނަވާ ކަމަށެވެ.

ރައީސް ޔާމީން އައު ސިޔާސީ ޕާޓީއެއް އުފައްދަވާއިރު އެޕާޓީ ވާނީ ރައީސް ޔާމީންގެ އިސްނެންގެވުުމާއި އެކު އުފައްދަވާ 3 ވަނަ ޕާޓީއަށެވެ. އެންމެ ފުރަތަމަ ރައީސް ޔާމީން ބައިވެރިވެވަޑައިގެން އުފެއްދި ސިޔާސީ ޕާޓީއަކީ، ޕީޕަލްސް އެލަޔަންސް (ޕީއޭ) އެވެ. އޭގެ ފަހުން ޕީޕީއެމްގެ މިލްކުވެރިކަމާއި މެދު ރައީސް މައުމޫނާއި ދެމެދު އުފެދުނު މައްސަލަތަކުގައި، ޕީއެންސީ އުފެއްދެވީވެސް ރައީސް ޔާމީންގެ އިސްނެންގެވުމަށެވެ.

ޕީއެންސީއަކީ، ވެރިކަން ކުރާ ޕާޓީ ނަމަވެސް، ރައީސް ޔާމީނަށް މިހާރު ޕީއެންސީގެ އެއްވެސް ބާރެއް ނެތެވެ.