Advertisement
ރައީސް ޔާމީން --
ރައީސް ޔާމީން ޕީޕީއެމްއިން ވަކިވެވަޑައިގެންފި
ކުރީގެ ރައީސް ޢަބުދުﷲ ޔާމީން ޢަބުދުލްޤައްޔޫމް ޕީޕީއެމްއިން ވަކިވެވަޑައިގެންފިއެވެ.
ރައީސް ޔާމީން ޕީޕީއެމްއިން ވަކިވެވަޑައިގެންނެވިކަން ޢިއުލާނުކުރެއްވީ އެމަނިކުފާނުގެ ވަކީލުންގެ ޓީމުގައި ހިމެނިވަޑައިގަންނަވާ، ޑރ.މުޙައްމަދު ޖަމީލު އަޙްމަދެވެ. ޑރ ޖަމީލް އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޔާމީން ޕީޕީއެމުން ވަކިވެވަޑައިގެންފި ކަމަށާއި، އެބޭފުޅުން ބުރަ މަސައްކަތް ކުރެއްވީ ރައީސް ޔާމީނަށްޓަކައި ކަމަށެވެ. އަދި ޖަލުގައި އަނިޔާ ތަޙައްމަލުކުރެއްވީ އެމަނިކުފާނުކަމުގައިވެސް ޑރ. ޖަމީލް ވިދާޅުވިއެވެ.
އަދި ރައްޔިތުން އެދުނު ގޮތަށް ރ.އިބޫގެ ވެރިކަން ބަދަލު ކުރުމަށް ރައީސް ޔާމީނު ހުރިހާ މަސައްކަތެއް ކޮށްދެއްވިކަމަށާއި، އެހެނަސް މިއަދު ޕާޓީގެ ލީޑަރޝިޕްގެ ވިސްނުން އެމަނިކުފާނާ ތަފާތުވެ، އެބޭފުޅުން ރައީސް ޔާމީނާއި ދުރަށް ހިނގައްޖެކަމުގައިވެސް ޖަމީލް ވަނީ ވިދާޅުވެފައެވެ.
އަދި ރައީސް ޔާމީން ޕީޕީއެމްއިން އިސްތިއުފާ ދެއްވައި، އެމަނިކުފާނުގެ ސިޔާސީ ވިސްނުމާ އެއްގޮތަށް ކުރިއަށްދާނެ އާ ސިޔާސީ ޕާޓީއެއް އުފެއްދެވުމުގެ މަސައްކަތް މިހާރުވަނީ ފައްޓަވާފައި ކަމުގައިވެސް ޑރ ޖަމީލް ވަނީ ވިދާޅުވެފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވީ، ރައީސް ޔާމީނުގެ ސަޕޯޓަރުންގެ ތާއީދު ހޯއްދަަވައިގެން ކަމުގައި ވީނަމަވެސް، ވެރިކަމުގެ ފުރަތަމަ ހަފްތާ ނުނިމެނީސް ރައީސް ޔާމީނާއި، ޑރ. މުޢިއްޒާއި ދެމެދު ވަނީ މައްސަލަތައް ޖެހިފައެވެ.
