މި ސަރުކާރު ގެނައީ ވަރަށް ފޮނި އުންމީދާއި އެކު ކަމަށާއި، މި ސަރުކާރުގަ ރެނދު އަޅުވައި ބަޣާވާތް ކުރަން އުޅޭ ފަރާތްތަކަށް އެފުރުޞަތު ނުދޭނެކަމުގައި ޕީއެންސީ އިން ބުނެފިއެވެ.

އެޕާޓީން މިހެން ބުނެފައި ވަނީ، އެޕާޓީގެ ކޯލިޝަން ޕާޓްނަރު ޕީޕިއެމްއާ ދެމެދު އުފެދިފައިވާ ނުތަނަވަސްކަން ބޮޑުވެ ވެރިކަމުގެ ކޯޅުންގަނޑަކަށް ބަދަލުވެފައިވާ ދަނޑިވަޅެއްގައެވެ.

ޕީއެންސީގެ ރިޔާސީ ޓިކެޓްގައި، ރިޔާސީ އިންތިޚާބުގައި ވާދަކުރެއްވި، ޑރ މުޙައްމަދު މުޢިއްޒަަށް އިންތިޚާބު ކާމިޔާބުވުމަށްފަހުގައި، ޕީޕީއެމްއާ ޕީއެންސީގެ ގުޅުންތައް ވަނީ ގޯސްވެެގެން ގޮސްފައެެވެ. ދެޕާޓީގެ މެދުގައި ކޯޅުންތައް ބޭރަށް ހުޅުފަޅައިގެންދިޔައީ، ޕީއެންސީގެ މެމްބަރޝިޕް ޑްރައިވް އިތުރުކޮށް ޕާޓީ ވަރުގަދަކުރުމުގެ ނަމުގައި، ޕީޕީއެމް އޮފީހުން ނުކުމެ، ޕީއެންސީ ވަކިން އަމިއްލަ އޮފީހެއް ޤާއިމްކުރި ހިސާބުންފެށިގެންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވިތާ 7 ދުވަސްވެސް ނުވަނީސް މިހާރު ވަނީ، ރައީސް ޔާމީނާއި ދެބޭފުޅުންގެ މެދުގައި ކޯޅުންތައް ފެށިފައެވެ. އަދި ކުރިން ޕީޕީއެމްގެ ނިވަލުގައި އޮތް ޕީއެންސީން މިހާރު ވަނީ، ޕީޕީއެމްގެ މައްޗަށް ބާރު އިސްކުރަންފަށާފައެވެ.

ސަރުކާރާއި ދެކޮޅަށް ސިޔާސީ ގޮޮތުން ބަޣާވާތެއް ހިންގަން އުޅުނުކަމުގެ މޭރުންވާ ގޮތަށް، ޕީއެންސީން ވާހަކަދައްކާފައި މިވަނީ، ޕީޕީއެމް ހިންގުމަށް ރައީސް ޔާމީނުގެ ފަރާތްޕުޅުން އައު ބޭފުޅުންތަކެއް ކަނޑައަޅުއްވައި އިޢުލާނުކުރައްވާފައި ވަނިކޮށެވެ. އަދި އެކަމަށް މިސަރުކާރުގެ ވަޒީރުންގެ މަޤާމުގައި ތިއްބެވި، ޕީޕީއެމްގެ ނައިބު ރައީސުންވަނީ ހުރަސްއަޅުއްވާފައެވެ.