ލަވަ ކިޔުމުގެ ދުނިޔޭގެ އެންމެ އުހުގައި އުދުހުމަށްފަހު، އެކަން ހުއްޓާލާ ފަހުން ދީނީ ހޭލުންތެރިކަން އިތުރު ކުރުމަށް އިސްކަމެއް ދީގެން މަސައްކަތް ކުރަމުން އަންނަ އަލީ ރަމީޒް، އަންގާރަ ދުވަހު ސޯޝަލް މީޑިއާގައި އަޖުމަ ބަލާލުމަށް ކުރި ޕޯސްޓަކަށް އެތައް ބައެއްގެ ތައުރީފު އޮހިއްޖެއެވެ.

"ޓަޗް" ހުރިތޯ ބެލުމަށް ކަމަށް ބުނެ އަލީ ރަމީޒް ޙިއްސާކުރީ "ތިޔައޭ ރަސޫލަކީ" މި މަދަހައިގެ ކުޑަ ތަންކޮޅެއް ކިޔާލުމަށްފަހުއެވެ. މި ވީޑިއޯ ހިއްސާކުރުމާ އެކީ ގިނަ މީހުން ބުނަމުން ދިޔައީ، އަލީ ރަމީޒްގެ ރަން އަޑަށް އަދިވެސް ބަދަލެއް ނާންނަކަމަށެވެ.

އޭގެ ފަހުން އަލީ ރަމީޒް ބުނެފައިވަނީ، އޭނާގެ ޕޯސްޓަށްފަހު އެ މަދަހަ އެއްކޮށް އަޑު އެހުމަށް ގިނަ ބަޔަކު ބޭނުންވެގެން އެދެމުން ދާތީ، ސްޓޫޑިއޯގައި ރެކޯޑް ކުރުމަށްފަހު ހުރިހާ އަޑު އެހުންތެރިންނަށް މަދަހަ ހަދިޔާ ކުރާނެ ކަމަށެވެ.

މި މަދަހައަކީ މީގެ 23 އަހަރު ކުރިން، 2000 ވަނަ އަހަރުގެ ނޮވެމްބަރު މަހުގައި ރިލީޒްކުރި އަލީ ރަމީޒްގެ އެންމެ ފުރަތަމަ މަދަހައެވެ. މި މަދަހަ ހިމެނޭ "ވިނަވި" މަދަހަ ސީޑީ ނެރުނީ އެ އަހަރުގެ ރަމަޟާން މަހާ ދިމާކޮށެވެ. ރަސޫލާގެ މާތް ސިފަ ފުޅުތަކުގެ މައްޗަށް ހަދާފައިވާ މި ޅެމަކީ، މަޝްހޫރު ޅެންވެރިޔާ އާދަމް ހަލީމް އަދުނާނުގެ ޅެމެކެވެ.

"ވިނަވި" މަދަހަ ސީޑީގެ 500 ކޮޕީ ހިލޭ ބަހާފައިވާއިރު، އަލީ ރަމީޒް ވަނީ މި މަދަހަ ސީޑީ އޭރުގެ ރައީސް، ރައީސް މައުމޫން އަބްދުލް ޤައްޔޫމަށް ވެދުމަށް ވެސް އަރުވާފައެވެ.

ހަވީރު ނޫސް، 27 ނޮވެމްބަރ 2000