މިއީ ހަމާސް އާއި އިސްރާއީލު ސިފައިންނާ ދެމެދު ކުރިޔަށްދާ ހަނގުރާމައިގެ 47 ވަނަ ދުވަސް، 22 ނޮވެމްބަރ 2023 ގެ ހެނދުނު 10:00 އާއި ހަމައަށް ހިނގާފައިވާ މައިގަނޑު ހާދިސާތަކުގެ އުސްއަލިތަކެވެ.

🔴  ޤަތަރު މެދުވެރިއަކަށްވެ، ހަމާސް އާއި އިސްރާއީލާއި ދެމެދު ކުރިޔަށް ގެންދިޔަ މަޝްވަރާތަކުން 4 ދުވަހަށް ހަނގުރާމަ މެދުކަނޑާލުމަށް އިސްރާއީލުން އެއްބަސްވެއްޖެ. ބަދަލުގައި ހަމާސްގެ ބެލުމުގެ ދަށުގައި ތިބި 50 އަސީރުން ދޫކޮށްލުމަށް ހަމާސްއިން އެއްބަސްވެފައިވޭ. އިސްރާއީލް ސަރުކާރުން ހާމަކޮށްފައިވާ ގޮތުގައި މި 50 މީހުންގެ ތެރޭގައި ހިމެނޭނީ އަންހެނުންނާއި ކުޑަކުދިން. އަދި އިތުރަށް ދޫކޮށްލާ ކޮންމެ 10 އަސީރަކަށް، ހަނގުރާމަ މެދުކަނޑާލާފައިވާ މުއްދަތަށް 1 ދުވަސް އިތުރު ކުރާނެކަމަށް ވެސް އިސްރާއީލުން ބުނޭ. ޖުމްލަ 237 އަސީރުން ހަމާސްގެ ބެލުމުގެ ދަށުގައި ތިބިކަމަށް ޙަބަރުތައް ބުނޭ.

🔴 މި އެއްބަސްވުމަށްފަހު ނަތަންޔާހޫ ބުނެފައިވަނީ، މެދުކެނޑުމަކަށްފަހު ހަނގުރާމަ އަލުން ފަށާނެކަމަށާއި، އަދި ހަމާސް އެއްކޮށް ނައްތާލާފައި ނޫނީ އެމީހުން ނުހުއްޓާނެ ކަމަށް.

🔴 އިސްރާއީލް ސިފައިން އަންނަނީ ހިފާފައިވާ ހުޅަނގު އައްސޭރީގައި ރެއިޑް އޮޕަރޭޝަންތައް ހިންގަމުން. އެގޮތުން ހެބްރަން އާއި ތުލްކަރެމްގައި ހުންނަ ދެއިޝެހް ރެފިއުޖީ ކޭމްޕް ވަނީ ބަލާފާސްކޮށްފައި.

🔴 ހިފާފައިވާ ހުޅަނގު އައްސޭރީގެ ވިލެޖެއް ކަމުގައިވާ އަޒުމްގައި އިސްރާއީލް ސިފައިން ކުރިޔަށް ގެންދިޔަ އޮޕަރޭޝަނެއްގައި 30 އަހަރުގެ ފަލަސްތީނުގެ މީހަކު މަރާލާފައިވާކަމަށް ރިޕޯޓުތައް ހާމަކޮށްފި.

🔴 އެމެރިކާއިން އިރާޤުގެ ދެ ސަރަޙައްދަކަށް ހަމަލާދީފި. އެމެރިކާއިން ބުނީ އެއީ ސީރިޔާ އަދި އިރާޤުގައި ތިބި އެމެރިކާ ސިފައިންނަށް އެކިފަހަރު މަތިން އިރާޤުގެ ޖަމާއަތްތަކާއި އިރާޤަށް ވާގިވެރިވާ ޖަމާއަތްތަކުން ހަމަލާދީފައިވާތީ އެކަމުގެ ބަދަލު ހިފުމެއް ކަމަށް.

🔴 އިސްރާއީލުން ދިން ހަމަލާއެއްގައި އިތުރު 2 ނޫސްވެރިއަކު މަރުވެފައިވާކަމަށް ފަލަސްތީނުގެ ނޫހަކުން ރިޕޯޓުކޮށްފި.